web counter
LEXO PA REKLAMA!

SHKARKO APP

App Store
Google Play

E fundit!

x

Njoftimi i Kuvendit për miratimin e "Zgjedhores" dhe "Territoriales"/ Bardhi: Nuk ka pasur votim në Konferencën e Kryetarëve

15 Tetor 2025, 14:40, Politikë CNA

Njoftimi i Kuvendit për miratimin e "Zgjedhores" dhe

Kreu i Grupit Parlamentar të PD-së, Gazment Bardhi, ka komentuar për gazetarët në selinë blu, njoftimin e shpërndarë nga Kuvendi se ka pasur dakordësi në Konferencën e Kryetarëve për dy projektvendimet e propozuara nga grupi parlamentar i PS-së për ngritjen e Reformës Territoriale dhe asaj Zgjedhore.

Bardhi është shprehur se njoftimi i Kuvendit ka qenë i rremë pasi sipas tij nuk ka pasur asnjë votim në Konferencën e Kryetarëve dhe asnjë dakorësi nga grupi parlamentar i PD-së. Ai tha se kanë paraqitur tri kërkesa për të cilat grupi parlamentar i PS-së ka kërkuar kohë deri nesër për t’i shqyrtuar.

"Shumë nga gazetarët më kanë kërkuar një koment mbi një njoftim të rremë të Kuvendit, lidhur me mbledhjen e sotme të Konferencës së Kryetarëve. Dua të sqaroj, fatmirësisht Konferenca është me audio dhe procesverbalet publikohen, që nuk ka pasur asnjë dakordësi nga grupi parlamentar i PD-së mbi dy projektvendimet e propozuara nga grupi parlamentar i PS-së, konkretisht për ngritjen e Komisionit për Reformën Zgjedhore dhe ngritjen e Komisionit për Reformën Administrativo-Territoriale.

Në vijim të qëndrimit që grupi parlamentar i PD-së ka miratuar në mbledhjen e 8 tetorit kemi paraqitur tre shqetësime-kërkesa në raport me të dyja projektvendimet. Së pari të garantimit të barazisë reale mes pozitës dhe opozitës dhe konsensusit në vendimmarrje në këto komisione. Së dyti ftesën dhe angazhimin respektivisht të ekspertëve të OSBE/ODIHR, KE dhe Komisionit të Venecias në të dy komisionet. Së treti që për fillimin e punës së komisionit për Reformën Zgjedhore duhet të pritet edhe raporti i fundit i OSBE/ODHIR, që pritet të bëhet publik brenda pak ditësh, për zgjedhjet e 11 majit.

Konkretisht kemi kërkuar ndryshimin e pikës 3 në projektvendimin për Reformën Zgjedhore që kërkon t’i imponojë opozitës, partinë e Tom Doshit si parti e opozitës. Ndërsa grupi i PS e ka të specifikuar që ka 8 anëtarë në komisionin e Reformës Zgjedhore, formulimi vijues është 8 përfaqësues të PS dhe 8 përfaqësues nga partitë e tjera parlamentare. Ndërsa nga njëra anë thonë se japim barazi mes mazhorancës dhe opozitës, nga ana tjetër na diktojnë se kush është opozita. Dhe kemi kërkuar sipas standardeve të traditës parlamentare të ruhet formati i formulimit që ka patur çdo komision i Reformës Zgjedhore, ku përcaktohen përfaqësues të grupeve parlamentare, 8 të PS, 6 të PD, 1 nga Aleanca për Ndryshim dhe 1 nga Partia e Lirisë.

Sa i takon Reformës Territoriale, propozimi ka qenë që mazhoranca të ketë shumicën, pra  komisioni të përbëhet nga 17 anëtarë, i ndarë 9 me 8, kërkesa jonë ka qen barazi, ruajtja e traditës parlamentare, që është konsoliduar me vendimin nr. 1 të vitit 2014 kur është ngritur komisioni i Reformës Territoriale në 2014 dhe me vendimin nr.13 të 2022, kur është ngritur përsëri komision që ka patur të garantuar barazi mes mazhorancës dhe opozitës dhe ka patur dy bashkëkryetarë më të drejtën e vetos, një nga PS dhe një nga PD. Për pasojë kemi kërkuar të ndryshohet pika 3, 10 dhe 11 e projektvendimit dhe diskutimi është trajtuar në parim, nuk ka patur asnjë votim. Kryetari i grupit të PS-së kërkoi kohë deri nesër për të mbledhur grupin e tij për këto tre kërkesa që kemi paraqitur në Konferencën e Kryetarëve. Prandaj dua të dënoj mashtrimin publik që ka shpërndarë si njoftim të Kuvendit, kryetari i Kuvendit sikur me dakordësi janë miratuar këto dy projektvendime, lajm i cili është marrë i paverifikuar nga mediat dhe është bërë fakt i kryer. Nuk ka patur asnjë dakordësi, kemi paraqitur këto tre kërkesa dhe grupi i PS ka marrë kohë për t'u menduar deri nesër dhe për të bërë konsultimin përkatës në grupin e vet parlamentar", tha Bardhi. /CNA





Lajmet e fundit nga