"Në takimin me kryetarin e bashkisë folëm për qytetin"/ Tarran viziton Pogradecin

26 Qershor 2025, 13:20, Politikë CNA

"Në takimin me kryetarin e bashkisë folëm për

Pogradeci ka mirëpritur për herë të parë ambasadorin e OSBE-së në Shqipëri, Michel Tarran, i cili zhvilloi një vizitë zyrtare në qytet dhe një takim me Këshillin e Lartë Gjyqësor. Në fokus të vizitës ishte prezantimi i një programi të ri që parashikon hapjen e zyrave të informimit në çdo gjykatë të vendit, një nismë që synon të rrisë transparencën dhe aksesin e publikut në sistemin e drejtësisë.

Gjatë qëndrimit në Pogradec, ambasadori u takua edhe me kryetarin e bashkisë, ku u diskutua për potencialin zhvillimor të qytetit dhe rajonit përreth. Ambasadori vlerësoi natyrën dhe resurset që ofron zona, por theksoi nevojën për më shumë promovim, veçanërisht në nivel ndërkombëtar.

"Erdha në Pogradec për një takim me Këshillin e Lartë Gjyqësor. Programi i ri parashikon hapjen e zyrave të informimit në çdo gjykatë, çka do të garantojë transparencën me publikun.

Është hera e parë që vizitoj Pogradecin. Në takimin me kryetarin e bashkisë folëm për qytetin dhe për rajonin, i cili ka një potencial të madh zhvillimi. Jeni me fat që keni këto pasuri natyrore të jashtëzakonshme, me liqenin, malet, pikat kufitare, që janë gjithashtu një mundësi zhvillimi. Keni potencial të madh, por ende jo shumë të njohur. Ka shumë punë për të promovuar Pogradecin, si për vizitorët e huaj, ashtu edhe për rajonin tuaj", tha Tarran.

OSBE po mbështet gjithashtu Këshillat Vendorë të Sigurisë, një nismë ku përfaqësues të institucioneve dhe shoqërisë civile bashkëpunojnë për të adresuar çështjet e sigurisë në komunitet. Sipas ambasadorit, siguria është përgjegjësi e përbashkët, dhe roli i qytetarëve dhe organizatave lokale është thelbësor në këtë proces.

Në vijim, OSBE parashikon edhe zhvillimin e programeve të tjera në mbështetje të grave, ekonomisë vendore, trashëgimisë kulturore dhe turizmit.

"Ne, si prezencë e OSBE-së, kemi disa projekte. Po mbështesim Këshillat Vendorë të Sigurisë, një iniciativë shumë interesante ku disa institucione dhe përfaqësues të shoqërisë civile takohen për të diskutuar problemet e sigurisë në bashki. Siguria nuk është vetëm detyrë e organeve ligjzbatuese, por e të gjithëve. Organizatat e shoqërisë civile në këtë kontekst mund të luajnë një rol të rëndësishëm, duke mbledhur informacione dhe duke tërhequr vëmendjen për problematika të veçanta, si në qytete, ashtu edhe në fshatra. Po mendojmë gjithashtu si të zhvillojmë programe të tjera mbështetëse për gratë, ekonominë, trashëgiminë kulturore, turizmin etj.", u shpreh ambasadori.

Vizita e ambasadorit të OSBE-së në Pogradec shënon një tjetër hap drejt forcimit të bashkëpunimit ndërmjet institucioneve vendore dhe partnerëve ndërkombëtarë.

Me projekte konkrete dhe mbështetje të vazhdueshme, synimi mbetet i qartë për ndërtimin e komuniteteve më të sigurta, më transparente dhe më të zhvilluara për të gjithë qytetarët./ CNA