web counter
LEXO PA REKLAMA!

SHKARKO APP

App Store
Google Play

E fundit!

x

“Ta kthejmë Shqipërinë në destinacion akademik”/ Manastirliu, në takimin e Ligës së Arsimit të Lartë

25 Qershor 2025, 11:56, Politikë CNA

“Ta kthejmë Shqipërinë në destinacion akademik”/

Ministrja e Arsimit dhe Sportit, Ogerta Manastirliu, mori pjesë sot në forumin e Ligës së Arsimit të Lartë “Gjon Durrahium”, ku theksoi vizionin e qeverisë për ta kthyer Shqipërinë në një destinacion akademik konkurrues në rajon dhe më gjerë.

“Jam e kënaqur që sot jam në këtë forum të radhës të Ligës së Arsimit të Lartë, ku me shumë kënaqësi konstatoj se janë vendosur piketat për sa i përket një tjetër etape të zhvillimit të arsimit të lartë publik dhe jopublik edhe në raport me dimensionin që vetë liga po vendos në ekosistemin e arsimit të lartë në Shqipëri. Ajo që sot ne po përjetojmë në ekosistemin e arsimit të lartë është zhvillimi me ritme të shpejta sa i përket dimensionit të ndërkombëtarizimit dhe profilizimit të universiteteve. Universitetet private janë pjesë e rëndësishme e arsimit të lartë. Ata luajnë një rol komplementar dhe ecim në një hap duke zhvilluar kështu standarde më të mira të arsimit, duke e bërë arsimin e lartë motor të zhvillimit të shoqërisë, motor të zhvillimit ekonomik, duke krijuar mundësinë që arsimi i lartë t’u përgjigjet sfidave të kohës, të krijojë dhe ndërtojë burime njerëzore të afta për t’iu përgjigjur tregut të punës jo vetëm atij kombëtar, por edhe atij global. Sot ne kemi universitete të huaja të cilat kanë hapur degët e tyre në Shqipëri, Kolegjin e Europës që finalizoi përpara pak ditësh dhe vitin e parë akademik në kampusin e Tiranës, ndërkohë që kemi hapur për herë të parë një universitet, i cili është i modelit të ri, Universiteti i Studimeve në Distancë të Spanjës që ka hapur kampusin e tij në Gjirokastër. Po punojmë fort për të pasur një tjetër universitet prestigjioz europian, Universitetin Compiegne të Francës që do të hapë kampusin e tij në Universitetin Politeknik të Tiranës”,-tha Manastirliu.

Në fjalën e saj, ministrja Manastirliu u ndal dhe te nxitja e kërkimit shkencor dhe inovacionit:

“Universitetet janë baza e kërkimit shkencor dhe si të tilla duhet që t’i shfrytëzojnë akoma më shumë potencialet edhe në aspektin e kërkimit shkencor se këto janë ato piketa që krijojnë standardin e lartë që duam për universitetet tona. Edhe universitetet jopublike kanë arritur të përthithin fonde nga Agjencia Kombëtare e Kërkimit Shkencor dhe Inovacionit. Janë 50 projekte gjatë 2023–2025 që janë përthithur nga universitetet jopublike. Vetëm këtë vit kemi financuar më shumë se 180 projekte të kërkimit shkencor dhe inovacionit ku një pjesë e tyre janë dedikuar për hapjen e laboratorëve të rinj duke zhvilluar dhe mbështetur infrastrukturën e kërkimit shkencor”,- tha Manastirliu.

Ministrja u ndal dhe te mbështetja e qeverisë për zhvillimin e kërkimit shkencor në universitetet tona.

“Me bërjen efektive të një tjetër instrumenti ligjor që është Ligji i Shkencës dhe Kërkimit Shkencor në Shqipëri, ne jemi duke punuar për plotësimin e të gjitha akteve nënligjore që ky ligj të mbështesë jo vetëm universitetet, por të mbështesë në tërësi institucionet, njësitë e kërkimit shkencor, të krijojmë qendrat e ekselencës, t’i mbështesim ata financiarisht, të motivojmë edhe më shumë bashkëpunimin jo vetëm ndëruniversitar, por edhe ndërinstitucional, por dhe ato me biznesin dhe sidomos t'u qasemi projekteve të Bashkimit Europian në një mënyrë sa më efektive dhe të kemi mundësi që ne të përfitojmë sa më shumë, jo vetëm të transferimit të teknologjisë, por nga ana tjetër të zhvillojmë kapacitetet tona njerëzore. Sfida jonë e përbashkët lidhet me ndërkombëtarizimin dhe profilizimin, kur flasim për ndërkombëtarizimin ajo që ne nënkuptojmë është ta bëjmë arsimin tonë një arsim me standarde sa më të larta, të përfshira me standarde sa më të mira të Bashkimit Europian. Ne mund t’ia dalim që në vitet që pasojnë ta kthejmë Shqipërinë në një destinacion akademik. Është e mundur sepse burimet dhe potencialet më të mira njerëzore i kemi këtu”,-tha ministrja e Arsimit dhe Sportit, Ogerta Manastirliu./CNA

 





Lajmet e fundit nga