Muçollari: Blerja dhe kapja e votave ishte masive, denoncimi i farsës elektorale domosdoshmëri

27 Maj 2025, 20:18, Politikë CNA

Muçollari: Blerja dhe kapja e votave ishte masive, denoncimi i

Grigels Muçollari e ka quajtur një sfidë të vështirë kandidimin e tij në zgjedhjet e 11 Majit pasi ishte në dijeni se nuk do të ishin të ndershme dhe të lira.

Pavarësisht këtij konstatimi, Muçollari deklaron se nuk ia kishte marrë mendja që makineria e paligjshme e qeverisë për blerjen dhe kapjen e çdo vote do të ishte aq masive sa të bënte të pamundur gjykimin e lirë të qytetarëve.

“Kur u futa në garën për deputet në listat e hapura të Partisë Demokratike, e dija se do të ishte një sfidë e vështirë. Nuk do të ishin zgjedhje të lira e të ndershme, pa dyshim. S'kishim asnjë iluzion. Por s'ma merrte mendja që makineria e paligjshme e qeverisë për kapjen, trysninë, blerjen e çdo vote do të ishte aq masive, sa të pamundësonte gjykimin e lirë të qytetarëve.

Në këto kushte, me gjithë përpjekjet, takimet e komunikimet e pafundme, me gjithë prekjen e çdo zone, me një program fantastik që kishte formën dhe përmasat e njeriut, të secilit, ndryshimi nuk ndodhi, sepse ndryshimi ishte ndaluar të ndodhte përpara 11 Majit.

Edhe kur qytetarët të prisnin mirë, të shprehnin simpati e mbështetje, pas qëndronte një patronazhist apo tentakulë e qeverisë, që e kishte zhveshur nga e drejta për të zgjedhur, që në një farë mënyre kishte blerë vullnetin e tij.

Nga ky deformim i madh, asgjë e mirë nuk do të lindë e nuk do të zhvillohet për shoqërinë”, shkruan ai.

Më tej Muçollari ka shprehur mirënjohjen për secalin qytetar që e ka votuar.Ai thekson se pas zgjedhjeve lypset një reflektim i thellë si shoqëri po ashtu dhe i PD-së.

Muçollari tha se përveç analizës prioritet mbetet dokumentimi i shkeljeve masive në votimet e 11 Majit.

“Megjithatë, 5,323 qytetarë e banorë të Tiranës më besuan dhe vunë shenjën e tyre te emri im. Jam pafundësisht mirënjohës.

Pas këtyre zgjedhjeve, na lypset një reflektim i thellë si shoqëri dhe po ashtu nga ne si Parti Demokratike. Nëse nuk ka më votë të lirë e të ndershme, a do ta pranojmë këtë, si vend, si komb? Denoncimi i farsës elektorale është domosdoshmëri. Është jetike. Para një përgjegjësie të tillë, duhet të reagojmë e të sillemi në këtë lartësi. Ne kemi gjëra për të korrigjuar, kemi mundësi të rritemi e, sidomos, kemi potencial e cilësi që duhet t’i vëmë në lëvizje.

Ne e kemi detyrim t’i ofrojmë shoqërisë zgjedhje të lira e të ndershme, duke u përmirësuar çdo ditë, duke analizuar çdo ditë, edhe sot, kur kemi prioritet dokumentimin e shkeljeve masive në votimet e 11 Majit”, përfundon Muçollari./ CNA