web counter
LEXO PA REKLAMA!

SHKARKO APP

App Store
Google Play

E fundit!

x

Me gjuhën politike të Metës dhe Berishës/ Kryemadhi sulmon SPAK-un

28 Tetor 2025, 12:40, Politikë CNA

Me gjuhën politike të Metës dhe Berishës/ Kryemadhi sulmon

Ish-deputetja Monika Kryemadhi, pas shtyrjes së seancës në GJKKO, ka reaguar me një postim në rrjetet sociale.

Kryemadhi ka zgjedhur të përdorë gjuhën politike të kreut të PL-së, Ilir Metës, dhe kreut të PD-së, Sali Berisha, teksa ka sulmuar Prokurorinë e Posaçme.

Sipas saj, SPAK-u e ka çuar çështjen për gjykim pa administruar të gjitha provat, ndërsa pretendon se kjo po bëhet për të mbajtur Metën në burg.

Postimi i plotë:

SPAK me direktivë politike
Drejtësi për pushtetin, jo për të vërtetën.

SPAK nuk ka zbuluar asnjë provë të re.
Ka kthyer vetëm përgjigje ndaj kërkesave që kam bërë unë vetë, përpara se të mbylleshin hetimet, më 14 gusht 2025.

Në këto përgjigje del qartë se: LSI ka paguar vetëm aq sa ka deklaruar zyrtarisht  dhe nuk ekziston asnjë kërkesë apo autorizim nga vetë LSI për pagesa nga të tretë.

Por në vend që të hetonte plotësisht këto fakte, SPAK e ka çuar çështjen për gjykim pa administruar të gjitha provat, vetëm për ta mbyllur dosjen dhe për të mbajtur Ilir Metën në burg.

Është e qartë për këdo: SPAK ka vepruar nën direktivë politike, sepse pa këtë direktivë, nuk do të kishte asnjë bazë ligjore për ta mbajtur Ilir Metën të burgosur.

Ajo që sot përpiqet të shitet si “provë e re” është, në fakt, një fashikull i plotë hetimor prej 450 faqesh!
Pra, SPAK ka çuar për gjykim një dosje të cilës i mungojnë 450 faqe hetimore, vetëm për një inat fëminor: të mbahet Ilir Meta në burg, sepse kalonin afatet ligjore të paraburgimit.

Drejtësia e komanduar nuk është drejtësi — është instrument i pushtetit. Dhe kjo e vërtetë, sado të mundohen ta fshehin, nuk do të mbetet e fshehur.

Kujtojmë se kryetari i PD-së, Sali Berisha, dhe kreu i PL-së, Ilir Meta, në daljet dhe konferencat e tyre kanë sulmuar Prokurorinë e Posaçme dhe drejtuesin e saj, se në vendimet e tyre ndikohen nga politika. Megjithatë kreu i SPAK-ut, në çdo komunikim për mediat ka nënvizuar se nuk ndikohen nga politika. Po ashtu ka vënë theksin se besimi i qytetarëve te ky institucion është rritur sikurse e kanë dëshmuar edhe sondazhet e ndryshme të kryera në vend. /CNA





Lajmet e fundit nga