Mazhoranca rrëzon me 54 vota mocionin për debat për "Onkologjikun"/ Sala: Caktuam fond 200 milionë lekë për barnat

6 Nëntor 2025, 12:23, Politikë CNA

Mazhoranca rrëzon me 54 vota mocionin për debat për

Kuvendi ka futur në rendin e ditës mocionin për debat për “Onkologjikun”. Kryetari i Komisionit të Shëndetësisë, Bardh Spahia, bëri prezantimin në Kuvend.

Spahia citoi raportin e KLSH-së dhe deklaroi se AKBMP nuk ka kryer asnjë inspektim për 3 vite, laboratori ka kryer vetëm 8 analiza në 3 vite, programi për barnat antitumorale është i nënfinancuar.

Deputeti demokrat kërkoi hetim parlamentar, transparenë të plotë, rritje të buxhetit për barna dhe pajisje, garanci ligjore për listën bazë të barnave.

"Dje në Konferencën e Kryetarëve kishte një 'jo' për të dakordësuar mocionin për barnat e 'Onkologjikut'.

Ka një nxitim nga kjo mazhorancë për të votuar projektligje si ai për barazinë gjinore që janë tërësisht antibiologjikë dhe antiligjorë të bazuar në agjenda antikombëtare dhe antishqiptare.

Ngurroni për ata dhjetëra mijëra pacientë e familjarë, keni parë dhe emisionet investigative.

Sot duhet të diskutonim mocionin për debat për sëmundjet tumorale, por kjo shumicë zgjodhi ta refuzojë debatin. Ky Parlament është kthyer në shtojcë të ekzekutivit, është e trishtë që përfaqësuesit e qytetarëve vetëm ngrenë kartonët dhe zbatojnë urdhrat. Ky debat nuk është për të bërë politikë, por qytetarët kërkojnë trajtim bazik që nuk mund t’u refuzohet nga asnjë qeveri.

Shteti që duhet t’u ofrojë mbështetje u ka kthyer kurrizin, raportin e keni në sirtar zonja ministre, ndërsa ju keni përgjegjësinë për të ruajtur shëndetin e qytetarëve. Raporti bën një pasqyrë të shërbimit ndaj qytetarit, të pacientëve që dergjen. Raporti tregon se 46% e barnave të autorizuara nuk janë eksportuar kurrë, farmacitë spitalore kanë barna të skaduara.

AKBMP nuk ka kryer asnjë inspektim për 3 vite, laboratori ka kryer vetëm 8 analiza në 3 vite, programi për barnat antitumorale është i nënfinancuar.

A ka sot pacientë në Europë dhe Britani që përballen me mungesë të kushteve spitalore dhe barnave?

Çdo vit buxheti për barnat ka rënë, ndërsa shifrat për konsulencë janë rritur.

Nuk ka shtretër, ekografia dhe mamografia nuk bëhen, pacientët detyrohen t’i blejnë vetë barnat, PET Scan nuk funksionon.

Debati i refuzuar ishte për qytetarët, jo për opozitën, ndaj sot kërkoj një hetim parlamentar, transparenë të plotë, rritje të buxhetit për barna dhe pajisje, garanci ligjore për listën bazë të ligjit.

Kur të votoni mendoni jeni me pacientët apo kundër tyre?", tha Spahia.

Ministrja e Shëndetësisë, Evis Sala, tha se nuk do të bëjë politikë me pacientët. Sala deklaroi se 3 ditë më parë është caktuar fondi prej 200 milionë lekësh për barnat në QSUT.

“Nuk dua të hyj në procedurat e parlamentit dhe nuk dua të bëj politikë me dhimbjen e pacientëve. Pak javë më parë kam pranuar një sfidë të madhe, që nuk është vetëm e imja dhe e qeverisë, por mbi të gjitha është personale pasi jam mjeke. E kam filluar karrierën pikërisht në atë spital, ku këto ditë kam prekur çdo skutë. Kam takuar pacientët, mjekët, infermierët, sanitarët. Pa zhurmë dhe pa median. Sfidat ekzistojnë dhe ne jemi duke vepruar. Vetëm 3 ditë më parë është aprovuar rialokimi i një fondi prej 200 milionë lekësh për barnat në QSUT”,-tha Sala.

Pas prezantimit dhe diskutimit mocioni u rrëzua me votat e mazhorancës./CNA