Projektbuxheti 2026/ Rama: Në shëndetësi përveç indeksimit vjetor do të fillojë dhe llogaritja e vjetërsisë

6 Nëntor 2025, 11:46, Politikë CNA

Projektbuxheti 2026/ Rama: Në shëndetësi përveç

Kryeministri Edi Rama, me anë të një videoje në rrjetet sociale, ka njoftuar të tjera rritje në buxhetin e shtetit.

Rama tha se në vitin 2026 do të nisë praktika e indeksimit vjetor për pagat e punonjësve të sektorit publik, në nivel qendror dhe vendor. Korrektim, i cili do të bëhet çdo vit në bazë të inflacionit.

Më tej, Rama u shpreh se nga rritja e pagës minimale do të përfitojnë 10 mijë e 600 punonjës shërbimi.

Kryeministri u ndal edhe te sektori i shëndetësisë, ku tha se përveç indeksimit vjetor do të fillojë edhe llogaritja e vjetërsisë në punë.

“Ka një tjetër lajm shumë të mirë në projektbuxhetin 2026, i cili është fillimi i praktikës së indeksimit vjetor, edhe për pagat e punonjësve të sektorit publik, qoftë në nivel qendror, qoftë nivel vendor, të cilat do të korrektohen çdo vit në bazë të inflacionit.

Kjo është një politikë e re pagash, që e kombinuar me rritjen e përgjithshme si rezultat i rritjes së pagës minimale për të gjithë, i shton gati 100 milionë euro, qysh në vitin e parë 2026, shumës që mandati i katërt do të vërë në dispozicion të rritjes së fuqisë blerëse të të gjitha kategorive shoqërore.

Kështu konkretisht: 10600 punonjës shërbimi, sanitare, shoferë, teknikë, protokollistë, arkivistë, magazinierë do të përfitojë nga rritja e pagës minimale me 10 mijë lekë të rinj në muaj. Për specialistët e administratës publike rritja do të jetë 5 mijë lekë të rinj. Mësuesit do të përfitojnë pagë, 3 mijë lekë të rinj më shumë në muaj. Për herë të parë në sektorin e shëndetësisë, përveç indeksimit vjetor, do të fillojë edhe llogaritja e vjetërsisë në punë, që do të thotë si mesatare për mjekët e përgjithshëm nga 131.700 lekë në 143.500 lekë të rinj në muaj.

Për mjekët në spitale nga 174 mijë lekë në 186 mijë lekë të rinj në muaj. Për infermierët nga 87 mijë lekë në 92.500 lekë në muaj. Po ashtu, edhe për punonjësit e policisë së shtetit, përveç indeksimit, do të ketë rritje për vjetërsinë në punë, e cila për gradat më të ulëta përkthehet në një rritje mesatare me 5 mijë lekë të rinj në muaj.

E thënë ndryshe, për një punonjës me vjetërsi mesatare 15 vjet, sipas gradave pagat rriten si më poshtë:

Për inspektorët e thjeshtë nga 80.500 lekë të rinj në 84.500 lekë të rinj, plus shtesa për kushtet e punës dhe ushqimit, që e çon pagën mesatarisht në 100 mijë lekë të rinj.

Për nënkomisarët, paga do të rritet nga 95.500 në 101 mijë lekë të rinj, e cila me shtesën për kushtet e punës dhe po ashtu, për ushqimin shkon në 116 mijë lekë të rinj.

Për komisarët nga 105 mijë në 110.600 dhe me shtesën për kushtet e punës, plus për ushqimin, shkon në 125.600 lekë të rinj.

Dhe për drejtuesit e thjeshtë, nga 130.500, paga do të shkojë 141.450 lekë të rinj, që me shtesën dhe me ushqimin bëhet mesatarisht 156.450 lekë të rinj.

Janë të gjitha lajme të mira për të gjitha këto kategori, sepse tani Shqipëria është në një nivel tjetër dhe ky fakt do të bëhet çdo vit dhe më i prekshëm në jetën e përditshme të njerëzve tanë, qoftë në sektorin publik, qoftë në atë privat, të njerëzve që jetojnë me punë. Sepse ata që na dhanë besimin e jashtëzakonshëm, me 83 mandate për Shqipërinë 2030, meritojnë çdo vit e më shumë dhe do të kenë çdo vit e më shumë.

Këta jemi ne, ky jam unë, kjo është Partia Socialiste e Shqipërisë”, tha Rama./CNA