Mandati i Xhaçkës/ Bardhi letër KE-së, PE-së dhe ambasadave në Tiranë: PS po e mbron

15 Prill 2024, 12:27, Politikë CNA

Mandati i Xhaçkës/ Bardhi letër KE-së, PE-së dhe

Gazment Bardhi

Kreu i Grupit Parlamentar të Partisë Demokratike, Gazment Bardhi, i ka dërguar letër Komisionit Evropian, Parlamentit Evropian dhe trupit diplomatik në Tiranë, ku i informon për mandatin e Olta Xhaçkës, për të cilën PS-ja votoi kundër dërgimit për verifikim në Gjykatën Kushtetuese.

Në letrën drejtuar Komisionerit të Bashkimit Evropian për Zgjerim dhe Fqinjësi, Oliver Varhelyi, eurodeputetes Isabel Santos, që është Raportere për Shqipërinë në Parlamentin Evropian, Bardhi thekson se socialistët refuzuan që të zbatojnë vendimin e Gjykatës Kushtetuese.

“Në çdo vend demokratik zbatimi i vendimeve të Gjykatës Kushtetuese është i detyrueshëm dhe themeli mbi të cilin ngrihet një shtet ligjor. As Kuvendi dhe asnjë institucion publik nuk mund të shpallë sovranitetin përkundrejt vendimeve të Gjykatës Kushtetuese, sepse kjo do të rrënonte parimin kushtetutes të balancës dhe kontrollit mes pushteteve, duke vënë në pikëpyetje vetë ekzistencën e shtetit, sepse do të merrte tiparet e qarta të një puçi kushtetues. Ky rast merr përmasat e një mbrojtjeje të pastër politike dhe pengimit të drejtësisë, po të mbahen në konsideratë edhe të dhënat e reja të hetuara dhe bëra publike nga SPAK-u. Nga ky hetim rezulton e provuar se pronësia mbi tokën është përfituar me dokumente tërësisht të falsifikuara duke bërë të mundur që një tokë bujqësore, me një sipërfaqe në total prej 10.592 m2, e ndodhur në Dhërmi/Vlorë, në pronësi shtet, të tjetërsohet përmes transaksioneve te të tretët në favor të subjektit privat në pronësi të bashkëshortit të deputetes Olta Xhaçka”, – thuhet në shkresën drejtuar ndërkombëtarëve.

Sipas Bardhit, PS-ja po dhunon Kushtetutën dhe po mbron politikisht Olta Xhaçkën.

“Duke besuar se nuk mbështesni standardin 'një drejtësi për Edi Ramën dhe një drejtësi tjetër për gjithë të tjerët', shpreh bindjen time se ky veprim i paprecedent nuk do të përkrahet nga ana juaj, qoftë edhe përmes kalimit të kësaj situate në heshtje”, përfundon letrën e tij kreu i grupit parlamentar të PD-së, Gazment Bardhi./CNA