Lapaj ngre shqetësimin/ Nuk subvencionohen fermerët dhe blegtorët, buxheti shkon vetëm për 5 "kokrra"

12 Nëntor 2023, 10:47, Politikë CNA

Lapaj ngre shqetësimin/ Nuk subvencionohen fermerët dhe

Themeluesi i lëvizjes politike “Shqipëria Bëhet”, Adriatik Lapaj, zhvilloi një bashkëbisedim me fermerë dhe blegtorë të fshatrave Drenovicë, Samaticë, Gorican, Kutalli, Pobrat dhe Rërëz.

Lapaj foli për subvencionet dhe ngriti shqetësimin se fermerët e blegtorët nuk marrin asnjë ndihmë nga shteti.

Sipas tij, buxheti i shtetit për bujqësinë, blegtorinë, peshkimin shkon për rroga në zyra dhe për vetëm pak persona të përzgjedhur.

"Rezulton që gjithë zona juaj, ka një sipërfaqe me sera rreth 500 hektarë, të cilat prodhojnë në vit, tani që flasim rreth 80 mijë tonë perime. Në vlerë tregu, në tregjet ku shiten përkthehen me 50.6 milionë euro, ose thënë ndryshe rreth 60 miliardë lekë. Ekonomia shqiptare që nga këto fshatra merr këto lekë, sa u kthen mbrapsht përmes financimeve apo subvencioneve? Sa i kthen fermerit të zakonshëm përmes infrastrukturës?

Ka dhe gjëra që janë bërë, por kemi mundësinë të bëjmë shumë më shumë në këtë vend. Cila është zgjidhja? Subvencionimi i prodhimit. Nuk mund të tatojmë as në bujqësi, as në blegtori, as në peshkim as në bletari, sepse asnjë vend i zhvilluar normal nuk i taton. Përkundrazi, i subvencionon.

Sa nga ju këtu në 5 vitet e fundit kanë marrë subvencione për plastmasin? Sa nga ju kanë marrë sunvencionim për plehrat kimikë? Sa kanë marrë subvencione për qumështin? Pra, qytetari i zakonshëm që punon tokën, e që mban bagëtitë e këtij vendi nuk merr asnjë gjë. Po ju jap disa shifra nga INSTAT. Buxheti i shtetit për bujqësinë, blegtorinë, peshkimin në total do do të jetë 130 milionë euro. Nga këto 100 milionë euro shkojnë për rroga në zyra, vetëm 30 milionë euro shkojnë për fermerin, blegtorin, që siç e dini nuk shkojnë as aty, por shkonë te pesë kokrra.

Lëreni atë ndarjen që nga Konferencë e Mukjes, ballist, komunist, nuk ka më. Interesi i xhepit tuaj, interesi i fëmijëve tuaj, interesi i xhepave tuaj, ky është ndryshimi", deklaroi ai.

Nga ana tjetër, fermerët dhe blegtorët ndanë shqetësimet dhe problematikat e tyre, si dhe vlerësuan faktin që dikush shkoi t'i takojë jashtë fushatës elektorale.

"Është një nga rastet e rralla që vjen dikush të dëgjojë hallet tona, problemet tona jashtë fushate. Sa herë ka fushata vijnë, japin premtimet e tyre, ikin, kalon fushata, kalon katërvjeçari, tetë, dymbëdhjetë po bëhen tani, dhe ne ngelim në vendnumëro, madje do ishte mirë po të ishim në vendnumëro, sepse po bëjmë regres të madh. Jemi duke u vjedhur dita-ditës, mundin tonë nuk e vlerëson askush dhe jemi duke u shtypur. Po trajohemi si ajo kafsha, si ai kali, për të mos thënë si ai gomari që i vjedhin punën dhe e shajnë e ofendojnë, e përçmojnë", u shpreh një fermer./ CNA