Kush e komandon sot Edi Ramën?!

9 Qershor 2026, 11:55, Politikë CNA

Deputeti i Partisë Demokratike, Belind Këlliçi, ka reaguar me akuza të forta ndaj Kryeministrit Edi Rama, duke deklaruar se sjellja e tij e fundit tregon një destabilizim të thellë politik dhe personal.

Këlliçi u shpreh se mënyra se si Rama po përjeton atë që ai e cilëson si “fundin e tij politik” tregon shumë për mënyrën se si ka ushtruar pushtetin ndër vite.

Sipas deputetit demokrat, sjelljet e kryeministrit karakterizohen nga impulse dhe irracionalitet, duke sjellë reagime që, sipas tij, nuk i përshtaten një drejtuesi të qeverisë.

Këlliçi tha se sharjet, ofendimet dhe sulmet janë tregues të një tronditjeje të madhe, të cilën ai e lidh me aferat korruptive dhe abuzimet që, sipas tij, kanë shoqëruar qeverisjen e Ramës.

“Kush e komandon sot Edi Ramën?!

Mënyra se si Edi Rama po përjeton fundin e tij politik, tregon shumë se çfarë ka bërë me pushtetin, si e ka administruar dhe dëshmon se sa e ka merituar ai besimin që i kanë dhënë qytetarët në gjithë këto vite.

Ka shumë dramë në sjelljet e Edi Ramës, ka impulse dhe irracionalitet çka e bëjnë të kryejë gjeste që sigurisht nuk i bën një njeri normal serioz, jo më një Kryeministër.

Aktet lunatike, sharjet, ofendimet, goditjet e kundërshtarëve e armiqve që kanë vërshuar nga gjithë anët, tregojnë se tronditja është shumë e madhe!

Tronditja lidhjet drejtpërdrejt me atë që ka bërë. Jo vetëm ai, po çdokush e di se çfarë Edi Rama ka bërë. Aferat financiare, korrupsioni, abuzimi, shkelja, përfitimi, përvetësimi, janë arsyet e destabilizimit të tij.

Fundi i tij politik në këtë rast është i barabatë dhe me fundin njerëzor, pasi e ardhmja pas ikjes së pushtetit është dhmibja e madhe që quhet drejtësi dhe vetmia e izolimi që quhet burg.

Ndaj nuk ka shumë politikë në aktivitetin e Ramës dhe analizën e ditëve të tij të fundit më mirë mund ta bëjnë psikologët.

Sa herë ta shihni të imitojë, të bëjë si balerinë, sa herë ta shihni të ulërasë, të shajë e linçojë në publik, kujtoni kush e komandon sot Edi Ramën.

Frika për atë që ka bërë dhe ndëshkimi i shpejtë që e pret!”, shkruan Këlliçi./ CNA