Kryetarja e Bashkisë Kurbin, dosjet ‘mal’ në SPAK/ Abuzime me rindërtimin, vjedhje të pronave dhe korrupsion

16 Nëntor 2024, 14:11, Politikë CNA

Kryetarja e Bashkisë Kurbin, dosjet ‘mal’ në SPAK/ Abuzime

Deputetja e Partisë Demokratike, Elda Hoti, në një deklaratë për mediat ka hedhur akuza ndaj kryetares së Bashkisë së Kurbinit, Majlinda Cara.

Hoti u shpreh se Majlinda Cara ka një mal me dosje në SPAK për disa vepra penale si shpërdorim detyre, abuzime me tenderët apo dhe grabitje të pronës.

Deputetja tha se Kurbini është në varfëri të skajshme dhe Rilindja është aq e pangopur për para sa u janë errur sytë dhe u marrin qytetarëve edhe qindarkën e fundit.

Hoti nënvizoi se PD do të vazhdojë të denoncojë shkeljet derisa Cara të japë llogari para drejtësisë.

“Jam në këtë konferencë për shtyp për t’i bërë publike se kryetares së Bashkisë Kurbin, Majlinda Cara, i janë bërë mal dosjet në SPAK, për disa vepra penale nga shpërdorimi i detyrës, abuzime me tenderët e deri edhe në grabitjen e pronave të qytetarëve.

Jam sot këtu si deputete e qarkut Lezhë, që t’u kërkoj institucioneve të drejtësisë të veprojnë pa humbur kohë. Çdo ditë që kalon dhe drejtësia nuk vepron, kostoja shkon te qytetarët e Kurbinit. Ndërsa dosjet flenë nëpër sirtarët e SPAK-ut, janë qytetarët e Kurbinit që çdo ditë paguajnë faturat e korrupsionit të Majlinda Carës dhe një sekti rreth saj.

E përsëris, mbi Majlinda Carën rëndojnë akuza të rënda për korrupsion, abuzimet me fondin e rindërtimit, tenderët që i komandon, deri në përfshirje për grabitjen e pronave të qytetarëve.

Në qoftë se institucionet do të vepronin, ajo sot nuk do të ishte në karrigen e kryetares së bashkisë, por do të ishte në karrigen e së pandehurës, duke u përballur me drejtësinë.

Koha është tani, çdo ditë që kalon është vonë.

Meqenëse mëkëmbësi i saj Edi Rama, nuk ka informacion, po njoftojmë se po i hahen kumbulla pas shpine.

Meqenëse ai nuk “e fal” korrupsionin, po i themi që Bashkia Kurbinit është kthyer në vatër abuzimi.

Kurbini është në varfëri të skajshme dhe Rilindja është aq e pangopur për para sa u janë errur sytë dhe u marrin edhe qindarkën e fundit.

Nëse drejtësia do të vepronte sot Majlinda Cara nuk do të drejtonte bashkinë e vjedhjes.

Shqipëria ndodhet në kthetrat e diktaturës, është detyrë e çdo qytetari dhe e opozitës t’i dalë përballë këtij regjimi, e cila ka kapur çdo institucion.

Propaganda dhe manipulimi që u bëhet qytetarëve duhet të marrë fund.

Partia Demokratike, unë si deputete e Qarkut Lezhë, do të vijojmë të bëjmë publike çdo shkelje të Majlinda Carës derisa ajo të japë llogari para drejtësisë se ku kanë shkuar paratë e kurbinasve të lënë në mëshirë të fatit”, tha Hoti./ CNA