web counter
LEXO PA REKLAMA!

SHKARKO APP

App Store
Google Play

Komisioni i Posaçëm/ Shehi: Po bëhet për presion ndaj SPAK-ut dhe GJKKO-së

31 Maj 2024, 13:10, Politikë CNA

Kreu i LZHK-së, Dashamir Shehi, ka komentuar ngritjen e Komisionit të Posaçëm që do të thërrasë në Apel institucionet.

Shehi tha në një konferencë me gazetarët se ky komision nuk lufton realisht korrupsionin, por po bëhet për të ushtruar presion ndaj SPAK-ut dhe GJKKO-së.

Ai deklaroi se opozita nuk do të bëhet pjesë e këtij teatri.

“LZHK nuk është dakord me këtë komision, prandaj nuk e kemi votuar. Pozicioni i opozitës ka qenë pozitiv që nuk mori pjesë. Ne e kemi konsideruar një dokument pa vlerë që nuk lufton realisht korrupsionin, qeveria i ka mjetet e nevojshme për ta luftuar korrupsionin. S’ka si e lufton korrupsionin një komision i dominuar po nga kjo qeveri, me kryetar po këta të shumicës. Është një lloj teatri për t’i hedhur hi sy popullit.

Rrugët për të luftuar korrupsionin janë të tjera. Ne kemi dyshimin permanent, edhe pjesë të tjera të opozitës, se kjo po bëhet për t’i bërë presion SPAK-ut dhe GJKKO-së. Për të ndërtuar një institucion që i jep vetes të drejtën të ndërhyjë dhe të krijojë presion mbi këtë lloj institucionesh. Do jetë dëm i madh. I ftoj kolegët e tjerë opozitarë t’i qëndrojnë këtij pozicioni. Nëse do të fillojnë tratativa, marrëveshja sido që të jetë komisioni do ta fusin veten në një situatë qesharake.

Njerëz që nuk diskutojnë në Kuvend, nesër shkojnë e negociojnë për t’u bërë pjesë e Komisioneve kur ne s’e kemi pranuar. Dy rrugë janë, o pranoje komisionin që në princip, o nuk jemi për këtë komision dhe mos u bëj pjesë. Çfarëdo lloj veprimi nga grupe opozitare për t'u bërë pjesë e këtij triku politik parazgjedhor për t’i bërë presion SPAK-ut do lërë përshtypje të keqe para shqiptarëve. Ata e bënë, e gëzofshin komisionin e vet, ne nuk duhet të bëhemi pjesë e këtij teatri”, u shpreh kreu i LZHK-së.

Sipas tij, mazhoranca ka dy qëllime me ngritjen e këtij Komisioni të Posaçëm.

“Komisioni ka si qëllim kryesor t’i bëjë presion Reformës në Drejtësi. Qëllimin e dytë ka me arnu sherret brenda PS-së, me u nda nga një peshqesh të vogël shefave socialistë”, theksoi Shehi./ CNA





Lajmet e fundit nga