Kërkesat e shoqatave pas rritjes së çmimit të naftës/ Rama: Nga buxheti i shtetit do të përfitojë vetëm një kategori

18 Mars 2026, 14:03, Politikë CNA

Kërkesat e shoqatave pas rritjes së çmimit të naftës/

Kryeministri Edi Rama u është përgjigjur kërkesave të Konfindustrisë dhe Shoqatës së Shoqërive të Hidrokarbureve mbi rriten e çmimit të naftës.

Lidhur me kërkesën që “shtesa e të ardhurave në buxhet nga zbatimi i TVSH-së mbi çmimet e rritura të karburanteve krahasimisht me kohën e parakrizës, të rikthehet drejpërdrejt për qytetarët dhe bizneset në çmimin fundor”, Rama tha se rimbursim do të ketë, por vetëm për kategorinë e pensionistëve.

Ndër të tjera, kreu i qeverisë theksoi se nuk do të ketë heqje të taksës së qarkullimit, ndërsa shtoi se filozofia e taksës në strukturën e çmimit është që “ndotësit më të mëdhenj do të paguajnë më shumë”.

“Duke iu referuar kërkesave nga shoqata të ndryshme, një që më ka tërhequr vëmendjen është që e gjithë shtesa e të ardhurave në buxhet nga zbatimi i TVSH-së mbi çmimet e rritura të karburanteve krahasimisht me kohën e parakrizës, të rikthehet drejpërdrejt për qytetarët dhe bizneset në çmimin fundor.

Ka vetëm një kategori që do të marrë më shumë sa herë të jepet mundësia, dhe është ajo e pensionistëve. Askush tjetër nuk do të kërkojë nga buxheti i shtetit më shumë sesa i takon, pavarësisht situatave që shkaktohen. Pagat janë rritur dhe rriten në mënyrë të vazhdueshme, sidomos për ato që kanë kualifikime. Nuk është më pyetja 'a vjen të punosh me këtë pagë', por 'sa e do pagën që të vish të punosh'. Në këtë fazë të zhvillimit të vendit jemi.

Përgjigjja jonë për çdo kërkesë, orvatje apo fantazi se çfarë vjen si rritje në buxhetin e shtetit, është po, por vetëm pensionistët. Taksa e qarkullimit e vendosur në strukturën e çmimit të karburantit, është se po iku nga këtu do të shkojë diku tjetër. Nëse shkon diku tjetër do të shkojë të përdoruesi i automjetit si taksë automjeti. Nuk besoj se ka drejtues sot që për aq karburant sa harxhon të paguajë katërfishin e kësaj vlere për makinën. Filozofia e taksës në strukturën e çmimit është ajo që ndotësit më të mëdhenj do të paguajnë më shumë”, tha Rama. /CNA