E fundit!

17:29 Kosova & Bota

Hetimi zbulon dështimet e Britanisë gjatë pandemisë së Covid-19/ U shpërdoruan rreth 10 miliardë paund për pajisje mbrojtëse

Një hetim për menaxhimin e pandemisë Covid-19 në Mbretërin...

“Kallëzimin e parë e bëri Lul Basha”/ Manja, në raportin për Ballukun: E ka respektuar masën e sigurisë

9 Mars 2026, 10:22, Politikë CNA

Këtë të hënë, në mbledhjen e Grupit Parlamentar të PS-së u bë publik raporti për kërkesën e SPAK-ut për ish-zëvendëskryeministren Belinda Balluku.

Për hartimin e relacionit u caktua deputeti dhe kryetari i Komisionit të Ligjeve, Ulsi Manja, i cili në fjalën e tij ndau në detaje arsyetimin kryesisht ligjor mbi çështjen, pasi, siç theksoi, nevojitet ndarje e politikës nga drejtësia.

Manja tha se Balluku e ka respektuar masën e sigurisë të vendosur ndaj saj dhe se kërkesa e SPAK-ut lidhet me një akt që i kërkohet Kuvendit që përbën vetëm rëndim të masës.

“Në përfundim kemi arritur në këtë raport në dakordësi me njëri-tjetrin. Sot ka ndodhur një realitet i ri juridik dhe institucional. Belinda nuk ka më funksionet si pasojë e ndryshimeve të qeverisë. Për pasojë, masa e pezullimit nga detyra nuk prodhon më asnjë efekt real. Por edhe mënyra se si SPAK-u ka hartuar akuzat, mbetet thellësisht hipotetike, pasi lidhet me funksionet ekzekutive që deputetja në fjalë nuk i ushtron më. Kjo çështje e drejtësisë është shndërruar në një debat të mbingarkuar para publikut. Kemi parë përpjekje për ta shndërruar në gjyq publik e mediatik që bie ndesh me prezumimin e pafajësisë. Ta ndajmë politikën nga drejtësia, zhurmën nga fakti dhe procesin e rregullt ligjor. Kërkesa e SPAK-ut, në rastin e deputetes Balluku ndryshon nga kërkesat e tjera, pasi nuk është për herë të parë. Kuevndit i kërkohet të zëvendësojë masë sigurimi që tani janë në fuqi, siç është ajo e daljes nga shteti, me një masë sigurimi më të rëndë, për të cilën po heton që në gusht 2024. Rasti i dytë në kërkesë përjashtohet, pasi provohet se e ka repektuar masën e sigurimit për daljen jashtë shtetit. Tani mbetet vetëm rëndimi i masës së sigurimit, bazuar në kërkesën e Prokurorisë së Posaçme. Kuvendi nuk ka funksion të gjykojë fajësinë, por vendos një filter që në gjykimin tonë nuk mund të jetë formal. Kallëzimi i parë është bërë nga Lulzim Basha. Koha kur u bënë kallëzimet koincidon me një periudhë parazgjedhore. Por në analizën tonë nuk jemi ndalur në këtë pikë, pasi respektojmë qëndrimin e palës mbrojtëse”,-tha Manja./CNA