Situata në Kosovë/ Hasimja: Partitë politike të gjejnë një lloj formule për zgjedhjen e presidentit

6 Mars 2026, 22:00, Politikë CNA

Situata në Kosovë/ Hasimja: Partitë politike të gjejnë

Politologu Ermal Hasimja komentoi sot gjerësisht situatën e vështirë politike në të cilën gjendet Kosova, lidhur me çështjen e zgjedhjes së presidentit të ri, që mund ta çojë vendin drejt zgjedhjeve të parakohshme.

I ftuar në A2 CNN, Hasimja u shpreh se problematika në këtë rast nuk ka të bëjë vetëm me vendimmarrjen politike, por edhe një debat juridik që është hapur tanimë.

Sipas politologut, një lloj formule që mund të sjellë zgjidhje mund të gjendet edhe nga vetë partitë politike, për interesin maksimal të vendit.

“Është diçka që vjen nga përplasja e dy objektivave, dy egove. Zoti Kurti dëshiron që në një farë mënyre të marrë në dorë edhe institucionin e presidencës. Ndërkohë që zonja Osmani do dëshironte që të vazhdonte. Aq më tepër që është ndjerë e inkurajuar edhe kohët e fundit, ndoshta dhe me atë nxitjen dhe pikët që mori ndoshta nga takimi me Trumpin dhe sekretarin Rubio. Kështu që besoj që të dyja palët e kanë menduar që janë në të drejtën e tyre.

Në rastin konkret tani çështja është shndërruar në një në një debat juridik që do duhet të vendoset në korniza juridike. Por interesante është kjo që unë mendoj që përtej asaj se po e lëmë atë ambicien personale të zonjës Osmani që është në të drejtën e vet legjitime, por po shohim edhe pjesën e zotit Kurti.

Unë mendoj që për nga mënyra se si është ndërtuar raporti i forcave politike në Kosovë mund të kishte qenë më e arsyeshme që të ishte një president konsensual, se nuk është si rastin e Shqipërisë, që ke dy forca të mëdha PD dhe PS edhe aty gjërat janë më të thjeshta në një farë mënyre dhe ka dhe kuptim ajo teoria që ai fituesi i merr të gjitha, por rastin e Kosovës nuk është ashtu. Në rastin e Kosovës ke një fragmentim më të madh të skenës parlamentare dhe aq më tepër në situatën ku është Kosova që ka nevojë për legjitimitet ekstra të brendshëm, sidomos mbas asaj çfarë ndodhi në këto 12 muajt e fundit me ribërjen e zgjedhjeve e tjerë e të tjerë.

Mendoj që edhe në kuadër të diskutimit, debateve edhe të negociatave, të të gjitha formave, dialogut etj., do duhej në fakt që presidenti të kishte një bazë sa më të gjerë legjitimiteti. Ndoshta dhe partitë mund ta gjejnë një lloj formule. Ka formula të ndryshme.

Ndoshta do të kishte qenë mirë që të ishte dhe dikush jashtë partive për t'i dhënë një lloj legjitimiteti shtesë, aq më tepër në qoftë se do të ishte një person i besueshëm, një person me vlera, për shembull nga shoqëria civile. Kjo do të ishte diçka shumë pozitive. Por këto janë qëndrimet. Nuk janë qëndrime joligjore ose të pandershme, janë qëndrime legjitime. Ka një dallim midis asaj çfarë është politikisht legjitime dhe ligjore dhe asaj çfarë është interesi maksimal i vendit”,-tha Hasimja./CNA