E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Atentati në Rinas/ Topalli: Shqipëria nuk është më republikë ligjore, por territor i krimit të organizuar

11 Nëntor 2025, 20:41, Politikë CNA

Atentati në Rinas/ Topalli: Shqipëria nuk është më

Deputetja e Partisë Demokratike, Jozefina Topalli ka reaguar lidhur me atentatin që tronditi ditën e sotme vendin, ku një person u ekzekutua dhe një tjetër u plagos rëndë pranë aeroportit të Rinasit.

Në postimin e saj, Topalli shprehet se atentati mafioz ndodhi dy orë pasi ministrja e Brendshmë deklaroi se vendi është më i sigurt se kurrë.

Ajo shprehet se kjo që ndodhi sot është fotografia më e saktë e shtetit që po shembet, por pa u rrëzuar ende. Deputetja shkruan më tej se vrasja e ndodhur pikërisht në Rinas ku hyjnë dhe dalin nga vendi çdo ditë qindra qytetarë, tregon se krimi nuk ka më frikë as nga ligji, as nga shteti dhe as nga drejtësia.

Topalli shton se Shqipëria nuk është më republikë ligjore, por është një territor i krimit të organizuar.

Postimi i plotë:

Sot në Rinas ndodhi një atentat mafioz. Një ekzekutim në zonën më të mbrojtur të vendit — aty ku çdo metër është nën kamera, çdo lëvizje presupozohet se duhej te ishte nën kontroll.

Megjithatë, krimi hyri, vrau, doli, dogji makinën dhe u zhduk si të ishte zot i territorit.

Dy orë më herët, në parlament, Ministria e Brendshme shpallte me ton fitimtar se “Shqipëria është më e sigurt se kurrë”.

Ky kontrast i frikshëm — mes propagandës dhe realitetit — është fotografia më e saktë e shtetit që po shembet, por pa u rrëzuar ende.

Shqipëria ndodhet në fazën ku krimi është integruar në sistem, ku pushteti dhe mafia nuk janë më dy botë të ndara, por një organizëm i vetëm që jeton me gjakun e qytetarëve të vet.

Sot, trafikantët që dikur fshiheshin, kthehen si “biznesmenë të suksesshëm”.

Qeveritaret që duhet t’i luftonin, i ftojnë në koncesione, në tendera, në lista e financime.

Kur krimi legalizohet, kur korrupsioni institucionalizohet, atëherë edhe vrasja bëhet pjesë e normalitetit.

Atentatet në Shqipëri nuk ndodhin për hakmarrje personale, por për ndarje tregjesh — të parave, të pushtetit, të mbrojtjes.

Kjo është skema e një republike të kapur.

Rinasi është simbol. Është porta e vendit. Dhe kur porta e vendit shndërrohet në skenë atentatesh, kjo tregon se krimi nuk ka më frikë as nga ligji, as nga shteti, as nga drejtësia.

Ky atentat nuk është rastësi. Është pasojë.

Pasojë e një dekade ku pastrimi i parave u quajt “zhvillim ekonomik”,

ku ndërtimet pa burim financiar u quajtën “rritje e GDP-së”,

ku heshtja ndaj krimit u quajt “stabilitet politik”.

Në vendet e kapura, vrasjet nuk ndodhin nga dobësia e shtetit — por nga forca e krimit që e sundon atë.

Dhe kur pushteti mburret me “ulje të vrasjeve”, ndërsa atentatet ndodhin në zemër të aeroportit, nuk kemi më të bëjmë me një dështim të sigurisë — por me kolapsin e shtetit si ide.

Sot, Shqipëria nuk është më republikë ligjore.

Është një territor i krimit të organizuar, i veshur me retorikë qeveritare dhe me uniforma që nuk mbrojnë, por mbulojnë.

Dhe çdo atentat i tillë është kujtesë se krimi nuk është më jashtë shtetit — ai është vetë shteti. Eshte narco shtet.

/CNA