Gazetarja “i mbyll gojën” Roland Bejkos/ Qytetarët duan të dëgjojnë programin, ti flet për Berishën

12 Prill 2023, 21:03, Politikë CNA

Gazetarja “i mbyll gojën” Roland Bejkos/ Qytetarët duan

Alba Alishani dhe Roland Bejko

Kandidati i PD-së së vulës për Tiranën, Roland Bejko, ishte i ftuar mbrëmjen e sotme në emisionin e Alba Alishanit, ku gazetarja e pyeti për programin që ai ka për kryeqytetin.

Por Bejko sulmoi kryetarin e PD-së Sali Berisha dhe kryetarin e PL-së Ilir Meta. Duke qenë se ai nuk po shpjegonte programin e tij, Alishani pyeti Ilir Kalemajn nëse sulmi ndaj Berishës dhe Metës është një strategji e duhur fushate.

Ajo vuri në dukje se Bejko gjatë gjithë emisionit ka folur për liderat e opozitës dhe jo për atë që duan të dëgjojnë qytetarët nga një kandidat, por ky i fundit tentoi të justifikohej.

Pjesë nga debati:

Bejko: Ne duam tu japim siguri qytetarëve që jemi në gjendje që pa Berishën të bëjmë një PD të vërtetë demokratike, jo parti kryetari, jo parti ku të vendosë një klan, por një parti ku të vendosin forumet, që të ketë ndarje të qartë të pushteteve, ndarjen e pushtetit të kryetarit, ndarjen e pushteteve tjera dhe me pushtete të balancuara e të kontrolluara, ku Kryesia të kontrollojë kryetarin, Kryesinë ta kontrollojë Këshilli Kombëtar dhe anëtarësia qoftë edhe nëpërmjet referendumit politik partiak të jetë ajo vendimmarrësja për vendimet e mëdha politike të partisë.

Alishani: Ky është debat që e kemi bërë thuajse një vit, sot duhet të flasim për menaxhimin e kryeqytetit meqënëse ju jeni kandidatura dhe programin e vizionin tuaj.

Bejko: Shiko, ideja ishte këtu, pyetja është pse do vijnë qytetarët te ne? Pse këta qytetarë duhet të na shikojnë ne si alternativë? Duhet të na shikojnë se japim një garanci që kemi një parti, duam të na ndihmojnë, të japin besimin që këtë parti ta bëjmë demokratike, ta rrisim dhe ta bëjmë konkurenciale.

Alishani: Zoti Kalemaj më thoni, retorika duket në perspektivë…

Bejko: Ndërsa për programin…

Alishani: Ta dëgjojmë pak zotin Kalemaj.

Bejko: Po më fal!

Alishani: Zoti Bejko flet shumë për Sali Berishën dhe Ilir Metën, pothuajse gjithë pjesën e parë të emisionit, a besoni se do duhej të zgjidhej një strategji dhe taktikë tjetër? Më saktë, duke qenë kandidaturë potenciale për menaxhimin e kryeqytetit të fliste më shumë për qytetin?

Bejko: Ju lutem mos i ndani. Unë flas për oligarkinë politike që nuk i ndaj dot. Është Edi Rama, Sali Berisha, Ilir Meta. Pra, është ky trinitet…

Alishani: Po, por besoj që njerëzit që duan t’ju votojnë nesër duan t’ju dëgjojnë tek flisni për qytetin dhe alternativat që keni për Tiranën.

Bejko: Dhe njëherë, ishim duke bërë pyetje dhe duke folur për politikën deri tani. Thashë dhe njëherë që për Tiranën kemi programin dhe do ta bëjmë prezent dhe jua lehtësoj punën. Ne kemi menduar që në fushatën tonë të prekim të gjitha llojet e problemeve që kanë qytetarët, e cila është raporti që kanë qytetarët me këtë oligarki, raporti që kanë qytetarët dhe demokratët me Sali Berishën dhe Ilir Metën dhe pjesa e tretë është pikërisht vizioni jonë për Tiranën./ CNA.al