Emri i Berishës në fletën e votimit/ “Përplasen” avokatët në Kolegjin Zgjedhor

21 Prill 2023, 19:38, Politikë CNA

Emri i Berishës në fletën e votimit/ “Përplasen”

Përfaqësuesi ligjor i koalicionit “Bashkë Fitojmë”, Altin Kaziaj

Në Kolegjin Zgjedhor është diskutuar pasditen e sotme ankimimi i koalicionit “Bashkë Fitojmë”, i cili kërkon që në fletën e votimit të shkruhet si kryetar emri i Sali Berishës.

Gjatë fjalës së tij, përfaqësuesi ligjor i “Bashkë Fitojmë”, Altin Kaziaj tha se të tre kryetarët e partive të këtij koalicioni kanë rënë dakord që në fletën e votimit të jetë emri i deputetit Sali Berisha.

“Është një shkresë e nënshkruar nga tre kryetarët e subjekteve, duke vënë një dakordësi me caktimin e drejtuesit të koalicionit, në emrin përbri, që është deputeti Sali Berisha. Të tre përfaqësuesit e subjekteve politike të koalicionit ‘Bashkë Fitojmë’ kërkojnë që emri Sali Berisha të vihet përbri emrit të kandidatit të koalicionit ‘Bashkë Fitojmë’ në fletën e votimit. Të merret parasysh nga ky kolegj duke e administruar si provë dhe pastaj e bëjmë edhe publike”, u shpreh ai.

Avokati theksoi se vendimi i KAS për të mos shkruar emrin e Berishës në fletën e votimit është absurd.

“Pse emri i Berishës shqetëson? Neni 64 e qartëson sesi regjistrohen partitë politike. Por kjo nis me vendimin absurd, për herë të parë në histori që një organ kolegjial si gjyqësor KAS që vendos se kush është kryetari i PD. Por pavarësisht kësaj, është e drejta koalicionit të vendosi se cili është personi që udhëheq këtë subjekt zgjedhor”, deklaroi Kaziaj.

Përfaqësuesi Ligjor i PD-së së Enkelejd Alibeajt, Indrit Sefa

Nga ana tjetër, përfaqësuesi Ligjor i PD-së së Enkelejd Alibeajt, Indrit Sefa ka kërkuar rrëzimin e kërkesës. Sipas tij, në fletën e votimit duhet të shkruhet emri i Ilir Metës.

"Kjo padi duhet rrëzuar për mungesë legjitimi të palës për sa kohë pala s’ka ankimuar vendimin e KQZ. Është futur si palë e interesuar për ankim të paraqitur nga PD. S’mund të vijë të kërkojë ndryshimin e një vendimi që nuk e ka ankimuar. Është detyrim ligjor, përsa kohë që është detyrim, patjetër që do jetë e pasqyruar.

Partia e Lirisë udhëheqëse e koalicionit. Emri që duhet të pasqyrohet është emri i udhëheqësi të koalicionit. Prandaj emri i Metës duhet të jetë në fletën e votimit. "Të gjitha të drejtat e detyrimet i takojnë partisë udhëheqëse" thuhet në kodi zgjedhor.

Është shteruar ky argument me vendim të KAS dhe me vendim të kolegjit zgjedhor në 2021. Fakt tjetër është që s’mund të ketë disa subjekte zgjedhore të pasqyrohen në mënyrë të pabarabartë në fletën e votimit. S’mund të kemi në fletët e votimit palë të pabarabarta mes subjekteve në fletët e votimit me informacione të barabarta e në këtë të drejtim KAS vendosi drejtë për të rrëzuar vendimin e komisionerit për mos vendosje emri. Kjo padi duhet të rrëzohet se pala e interesuar s’mund të kërkojë ndryshimin e një vendimi kur se ka ankimuar, i kanë kaluar të gjitha afatet ligjore", theksoi Sefa./ CNA.al