Denoncimi i fortë i Këlliçit për Idajet Beqirin/ “Dënoi 5 persona me gjysmë shekulli burg dhe mbi 20 vite internim”

5 Janar 2025, 10:15, Politikë CNA

Denoncimi i fortë i Këlliçit për Idajet Beqirin/

Drejtuesi Politik i PD-së për qarkun e Tiranës, Belind Këlliçi

Drejtuesi Politik i PD-së për qarkun e Tiranës, Belind Këlliçi, ka bërë një denoncim të fortë për Idajet Beqirin, të cilit së fundi i është hequr edhe licenca e avokatit nga Dhoma Kombëtare e Avokatisë, pasi akuzohet se ka mashtruar dhe ka gënjyer qytetarët.

Këlliçi thotë se Beqiri, në kohën kur ishte kryetar i Gjykatës së Krujës, midis viteve 1980-1981 ka dënuar 5 persona me të paktën gjysmë shekulli burg dhe mbi 20 vite internim.

“Në këtë moment që flasim dhe nga të dhënat që unë kam, më rezulton se midis viteve 1980-1981 ka dënuar me të paktën gjysmë shekulli burg dhe mbi 20 vite internim personat e mëposhtëm: Valter Aldo Palu, 8 v ite burg dhe 3 vite internim, Lulash Mark Thanën, 6 vite burg dhe 3 vite internim, Kol Mark Ujka, 9 vite burg dhe 5 vite internim, Beqir Topçiu, 10 vite burg dhe 5 vite internim, Sami Shaban Kupi, 10 vite burg dhe 5 vite internim, si kryetar i Gjykatës së Krujës. Do ua faktoj një për një, por do pres të shprehet organi i akuzës.”

Ai zbuloi edhe shkakun se pse Beqiri e ka kallëzuar në SPAK. Demokrati thotë se pas Beqirit fshihet vetë kryebashkiaku Erion Veliaj dhe botuesi Carlo Bollino. Këta njerëz, tha Këlliçi, synojnë të hedhin baltë dhe linçojnë personat që kanë ngritur zërin për të mbrojtur interesin publik.

“Me mbeturina të tilla, jo që nuk stepemi, por motivohem 10-fish më shumë për t’u çjerrë maskën të gjithë hajdutëve dhe pagatorëve të këtyre njerëzve që marrin para për të hedhur baltë për këdo që ngre zërin në interes dhe në mbrojtje të qytetarëve. Nëse mendojnë se na kanë frikësuar, e kanë të kotë. Pushka top Idajetit numër 1, Idajetit numër 2 se në fakt janë Erion Veliaj dhe Carlo Bollino që i bëjnë këto. Bollino-n që paguhet nga inceneratorët e Tiranës e pres më 27 janar në Gjykatë, mos të fshihet, po të më vijë në gjyq aty dhe ballë për ballë të shihemi në sallën e gjyqit, meqë ai pretendon se i fshihem unë."

Këlliçi tha se pavarësisht përpjekjeve Veliaj, Bolino, Beqiri dhe kushdo tjetër nuk do t’ia dalë që të ndalë demokratin për të zbuluar aferat që bëhen në kurriz të qytetarëve./CNA