web counter
LEXO PA REKLAMA!

SHKARKO APP

App Store
Google Play

Berisha nga Strasburgu: Paraqita lidhjen direkte të Ramës me kartelet e drogës

27 Janar 2026, 13:04, Politikë CNA

Berisha nga Strasburgu: Paraqita lidhjen direkte të Ramës me kartelet

Kryetari i Partisë Demokratike, Sali Berisha, në fjalën e tij nga Strasburgu, deklaroi se në debatin e zhvilluar në Grupin Parlamentar të EPP-së ndau disa nga problematikat e qeverisjes në vend.

Sipas Berishës, në debat paraqiti lidhjen direkte të kryeministrit Edi Rama me kartelet e drogës, që, sipas tij, e kanë shndërruar vendin në një parajsë të larjes së parave të pista.

“Dje gjatë ditës në debatin e zhvilluar në Grupin Parlamentar të EPP-së për zgjedhjet në Shqipëri dhe raportin e ‘Terapisë konvertuese’ paraqita para audiencës rrezikun e madh që përfaqëson narkoshteti shqiptar me në krye Edi Ramën apo siç quhet rëndom Ramaduro apo Noriega i Europës për sigurinë e vendeve të rajonit dhe vendeve të Europës.

Në fjalën time, paraqita dominimin e tregut të drogës në Europë, marijuanës, heroinës, kokainës nga kartelet e drogës të lidhura direkt me Edi Ramën, të komanduara direkt prej tij, i cili e ka shndërruar Shqipërinë në një parajsë të larjes së parave të tyre, në qindra kulla, ndërtesa, resorte turistike.

Shpreha kërkesën që vendet anëtare të Këshillit të Europës, Parlamentet e këtyre vendeve, të ngrenë zërin e tyre ndaj këtij rreziku serioz që u vjen nga një vend i vogël, i cili ka të gjitha potencialet e mëdha të zhvillimit dhe e ka zhytur regjimi në drogë, vetëm për qëllime elektorale.

Po kështu, te rreziku i madh që përfaqëson Shqipëria, u ndala tek AKSHI, kopshti familjar i Edi Ramës, në të cilin koordinatori kryesor i karteleve të drogës me anëtarët e familjes Rama, kanë plaçkitur qindra e qindra miliona euro. Por mbi të gjitha Ergys Agasi ka eksportuar të gjitha të dhënat e internetit që ekzistojnë në Shqipëri, te klanet kriminale dhe armiqtë e NATO-s dhe ky është një rrezik i madh që Shqipëria shpërndan në rajon dhe Europë.

Mirëkuptimi ishte i plotë nga audienca.

Përveç kësaj, mora fjalën në debatin që u zhvillua për raportin mbi ‘terapinë konvertuese’, terapinë çnjerëzore, një agresion i vërtetë që bëhet ndaj fëmijëve për të ndryshuar gjinitë.

Ftova të pranishmit që të vijnë në Shqipëri, të shohin pasojat e rënda të transformimit të Shqipërisë në republikën e Xhorxh Soros apo në kopshtin e lulëzuar të këtij të fundit, ku fëmijëve në kopsht dhe në shkolla fillore, u jepen tekste, figurina dhe objekte mësimore për t’i manipuluar në drejtim të ndryshimit të gjinisë.

Theksova se kjo propagandë është propaganda e ekstremit të majtë që synon rivendosjen e një diktature të rrezikshme të ekstremit të majtë, jo vetëm në Shqipëri, por dhe në Europë e botë.

Debatet për këtë çështje natyrisht nuk ishin të njëjta, por në tërësi u shprehën rezerva shumë të mëdha për raportin i cili në njëfarë mënyre kërkonte të legjitimonte ‘terapinë konvertuese’ ndaj fëmijëve për ndryshim gjinie”,-tha Berisha./CNA





Lajmet e fundit nga