E fundit!

12:16 Aktualitet

SPAK kërkon 98 vite burg për Durim Bamin, Aldo Avdylin dhe 5 të tjerë

Prokuroria e Posaçme ka dhënë pretencën për disa nga të pa...

Berisha ‘i hakërrehet’ Ramës/ Thirrje qytetarëve

9 Qershor 2022, 17:28, Politikë CNA

Berisha ‘i hakërrehet’ Ramës/ Thirrje qytetarëve

Ish-kryeministri dhe kryetari i Partisë Demokratike, Sali Berisha

Ish-kryeministri dhe kryetari i Partisë Demokratike, Sali Berisha, ka folur me tone të ashpra ndaj kryeministrit Edi Rama, lidhur me nismën “Ballkani i Hapur”.

Berisha tha se Rama ka rrethuar Kosovën me projektin që e cilëson si ruso-serb, në një garë jo miqësore. Më tej, ish-kryeministri shpjegoi edhe arsyet se përse vijon të shkojë në Parlament.

“Ka rrethuar Kosovën me projektin ruso-serb të ‘Ballkanit të Hapur’ në një garë jo miqësore. Një njeri që refuzon njëlloj si një ultranacionalist serb e vasal i Vuçiç, të njohë gjenocidin ne Srebrenicë. Një njeri që nuk stepet para pafajësisë hyjnore të 1400 fëmijëve të Kosovës që u vranë, u therën, u masakruan, u dogjën të gjallë nga barbarët e Vuçiç që thërriste dhe bërtiste, për një serb të vriten 100 myslimanë.

Çdo ditë unë e pyes veten si mund të rri unë në një sallë me një njeri që ka si interesa të veta interesat serbe dhe antishqiptare. Secili nga ju që dëgjoni këto vlerësime me shumë të drejtë shtoni pyetjen: Çfarë do ti Sali në Parlament? Përgjigjja ime është një dhe vetëm një, unë vij këtu dhe do të vij e nuk mungoj sepse këta qeveritarë në çdo fjalë që thonë vetëm ju mashtrojnë. Dhe së dyti, këta ministra me kreun e tyre në çdo firmë që hedhin vetëm ju vjedhin ju të dashur fëmijë, të rinj, të moshuar, nxënës, studentë, fermerë, biznesmenë, të sëmurë, rrogëtarë të këtij shteti. Atëherë, nuk mund të mos jem unë këtu”, u shpreh ai nga foltorja.

Gjithashtu kreu i demokratëve u ndal edhe te gjendja ekonomike e shqiptarëve, e cila është ndikuar nga pandemia dhe lufta Rusi-Ukrainë.

Berisha i bëri thirrje qytetarëve të ngrihen, pasi pretendon se qeveria ka mungesë totale ndjeshmërie ndaj dhimbjeve, vuajtjeve dhe sakrificave.

“E dini ju që është rritur me 48% eksporti i prodhimeve bujqësore serbe këto 4 muaj? Ti që përfaqëson Korçën shko në Dvoran dhe shih sa kuaintal, tonelata mollë janë hedhur se vijnë mollët serbe këtu. Ju që flisni se janë rritur eksportet, shkoni në Myzeqe dhe pyesni sa fermerë kanë therur lopët e racës dhe çfarë drame është për një familje fermeri nëse ther lopët e racës. Pyesni pak serat, pronarët e serave që i kanë ngritur me djersën më të madhe, që po falimentojnë, por për ju ata nuk ekzistojnë, ata janë qenie vetëm për t’i vjedhur dhe për të ikur nga Shqipëria.

Prandaj jam këtu për t’i bërë thirrje shqiptarëve, të ngrihemi se siç kanë këta mungesë totale ndjeshmërie ndaj dhimbjeve, vuajtjeve, sakrificave tuaja, nuk mund të kemi ne mungesë ndjeshmërie ndaj këtyre akteve që kryejnë ndaj fëmijëve, grave, burrave, biznesmenëve, fermerëve, të sëmurëve, të shëndoshëve, studentëve dhe ndaj të gjithë shqiptarëve”, nënvizoi ish-kryeministri./ B.A. – CNA.al