web counter
LEXO PA REKLAMA!

SHKARKO APP

App Store
Google Play

E fundit!

x

"BE nuk ka siguri pa BP", Marta Kos: Vendet e rajonit duhet të kenë të njëjtin ritëm në përmbushjen e reformave

21 Nëntor 2025, 10:26, Politikë CNA

Komisionerja e Bashkimit Europian për Zgjerim, Marta Kos, ka mbajtur fjalën e saj në nisje të samitit për Planin e Rritjes. Komisionerja u shpreh se çështja e zgjerimit ka të bëjë gjithnjë e më shumë me sigurinë dhe theksoi se Europa nuk mund të jetë e sigurt pa Ballkanin Perëndimor.

Ajo tha se rajoni i Ballkanit Perëndimor është pjesë e Europës, por kjo duhet bërë edhe në mënyrë institucionale. Kos u shpreh se të gjitha vendet e rajonit duhet të ecin me të njëjtin ritëm në përmbushjen e reformave, të cilat përshpejtojnë procesin e integrimit.

Gjithashtu, Komisionerja u shpreh se ka mungesë ecurie në integrimin ekonomik rajonal, ku shtoi se një treg i përbashkët rajonal do të rriste ekonomitë e vendeve me 10%.  

“Kënaqësi dhe nder që jam këtu pak pasi kemi publikuar paketën e zgjerimit për BE-në. Gjithnjë e më shumë kjo çështje ka të bëjë me sigurinë. Dhe BE nuk mund të jetë e sigurt pa Ballkanin Perëndimor. Këto takime për Planin e Rritjes po hapin gjithnjë e më shumë dyer. Shtëpia juaj, Europa, po ju pret. Ju jeni pjesë e Europës, por duhet ta bëjmë edhe institucionale. Sot jemi për të bërë një vlerësim se çfarë ka ecur mirë me Planin e Rritjes. Tani është momenti i duhur për të bashkëbiseduar. Por dy nga vendet e rajonit nuk kanë nisur ende me zbatimin e reformave, ndërsa dy të tjera kanë zbatuar mbi 50% të reformave të dakordësuara. 

Sa u përket fondeve, jemi ende nën 10% të shumës totale, totalja, 400 milionë euro nga një paketë prej 6 miliardë eurosh që janë lënë mënjanë për rajonin, ne mund të bëjmë më shumë dhe duhet të bëjmë më shumë. KE dëshiron që plani i rritjes të jetë i suksesshëm. Kam folur për nevojën për të integruar të gjithë fqinjët tanë në sa më shumë fusha të ndryshme të politikave të BE-së.

Duam që BE të jetë që sot realitet i prekshëm për qytetarët tuaj. Në disa fusha kjo punë ka marrë formën e vet. Shqiptarët, malazezët dhe maqedonasit përfitojnë nga fondet e SEPA-s. Por duam që të ecni të gjithë njësoj, të mos ngelet asnjë mbrapa. Të gjithë jeni pjesë e BE-së. Në qershor do të kemi skadimin e periudhës njëvjeçare për pritjen e reformave të papërmbushura. Kemi mungesë ecurie në integrimin ekonomik rajonal. Një treg i përbashkët rajonal do të rriste ekonomitë tuaja me 10%. Reformat që kemi rënë dakord nuk janë të lehta, por përshpejtojnë integrimin. Le të flasim se si instrumentet tona tërheqin investitorë të huaj në rajon", u shpreh Kos. /CNA





Lajmet e fundit nga