web counter
LEXO PA REKLAMA!

SHKARKO APP

App Store
Google Play

E fundit!

x

A po e bën kurban Rama Gjykatën Kushtetuese për të bërë kryetar Ardian Dvoranin?

16 Dhjetor 2024, 09:51, Politikë REDAKSIONALE

A po e bën kurban Rama Gjykatën Kushtetuese për të

Debati për afate procedurash dhe emërimesh në poste të drejtësisë nuk është gjë e re.

Kushtetuta dhe ligjet që kishin për objektiv ngritjen e një drejtësie të ndryshme në organizim nga ajo e para, janë shkruar shpesh keq. Me afate që konstatohen se janë kapërcyer ndërkohë që aktet e miratuara nuk kishin hyrë ende në fuqi.

Kjo është arsyeja për shembull se pse kishim disa versione, (në varësi se kush i lexonte dispozitat), si në rastin e zgjedhjes së Arta Markut si Prokurore e Përgjithshme, në kriteret e përzgjedhjes së anëtarëve të Gjykatës së Lartë etj.

Për shkak të teksteve të shkruara keq nga papërgjegjshmëria, klientelizmi ose konflikti i interesit që shkruesit kishin me objektivat personalë për postet e reja të pritshme, më shumë sesa një herë, zgjidhjet janë improvizuar në funksion të qëllimit që kërkohej të arrihej.

Rasti i afateve të mandateve të anëtarëve të Gjykatës Kushtetuese është ai më i riu në konfliktin e interpretimeve.

Padronët e drejtësisë së re, përfaqësuar aktivisht nga Sokol Sadushi, sot kanë si objektiv emërimin e Ardian Dvoranit në postin e kryetarit të Gjykatës Kushtetuese.

A po e bën kurban Rama Gjykatën Kushtetuese për të
Ardian Dvorani

Ky është objektivi të cilit kanë nisur t'i shërbejnë, që prej ditës kur një zonjë e promovuar nga Artan Hoxha papritur dha dorëheqjen nga karrigja e anëtares së Gjykatës Kushtetuese. Pa asnjë shpjegim, Elsa Toska largohet nga Gjykata Kushtetuese, përpara afatit të mandatit, (por gjithsesi përpara gjithë versioneve të ndryshme mbi afatin e mandatit të saj), dhe përpara se të fillonte viti i i ri akademik në auditorët që prodhojne juristë dhe magjistratë.

Për ata që duan ta bëjnë vetë ushtrimin e interpretimit të afateve, po sqarojmë se Elsa Toska ka një akt emërimi nga Kuvendi ku përcaktohet se ajo zgjidhet për një mandat të plotë. Emërimi i zonjës Toska është i vitit 2018 dhe është botuar në Fletoren Zyrtare në vitin 2019.

A po e bën kurban Rama Gjykatën Kushtetuese për të

Bëjini vetë llogaritë se kur përfundon ai mandat dhe sa kohë duhet të rrijë zëvendësuesi në karrigen ku deri para disa muajsh ulej zonja Toska. Për të provuar ushtrimin e llogaritjes së afateve, merrni hapni pastaj Kushtetutën dhe ligjin e fushës!

Duhet thënë se ishte momenti i dorëheqjes së zonjës Toska, kur hyri në lojë protagonizmi delirant i zonjës Spiropali. Kjo e fundit duke shfrytëzuar miqësinë me kryetaren e Gjykatës Kushtetuese, duke e ditur lojë të lehtë, i hyri leximit dhe interpretimit të dispozitave të Kushtetutës, të cilat siç thamë, interpretohen sipas hallit të atij që i lexon. Dhe Elisa që kujtoi se ishte ajo që e ndante shapin nga sheqeri, pa nga halli i shoqërisë së vet dhe ndërhyri në proces me një interpretim alternativ nga ai i përgatitur nga shërbimet e Kuvendit, (ose më mirë të themi nga interpretimi që Sokol Sadushi kishte infiltruar në shërbimet e Kuvendit).

Pasi kishte zbrazur karrigen e Elsa Toskës, banda që po komandon drejtësinë po kërkon edhe karrigen e Holta Zaçes! Kanë hallin e rrotacionit po thonë!

A po e bën kurban Rama Gjykatën Kushtetuese për të

Është shumë intrigues fakti që zonjës Zaçe i përmendet miqësia me zonjën Fullani (pa asnjë funksion në drejtësi), për t'ia faturuar asaj sot emërimin e dikurshëm të zonjës Zaçe në Gjykatën Kushtetuese. Pse jo Kreshnik Spahiut për shembull, meqë përmendin shpesh punësimin e Zaçes pranë klinikës ligjore për të miturit?

Faturuesit e emërimit të Zaçes, harrojnë miqësinë e saj p.sh. me Elisa Spiropalin, e cila në emër të kësaj miqësie, zëvendësoi interpretimin e shërbimeve të Kuvendit (Sokol Sadushit), me atë të dhënë nga vetë Holta Zaçe.

Për të gjithë hipokritët: e vërteta e emërimit të Holta Zaçes kalon nga Sokol Sadushi! Faturuesit harrojnë të kujtojnë p.sh. se edhe bashkëshortja e Sadushit ka qenë e punësuar te Klinika Ligjore e Holta Zaçes (në atë kohë Holta Kotherja).

Është fakt i njohur publikisht se nëse bëhet fjalë për promovime në sistem, nuk ka njeri sot që nuk e di që ato kalojnë nga banda Hoxha-Sadushi.

Ndaj s'ka rëndësi se kush ua paska servirur atyre Holta Zaçen, kur asaj i lindi në zemër të kontribuonte për këtë popull!

Zonja Zaçe gjithsesi duhet përgëzuar se ajo e paska pasur më seriozisht kontributin, ndryshe nga zonja Toska që e braktisi detyrën në mes të rrugës.

A po e bën kurban Rama Gjykatën Kushtetuese për të

Duhet të shtojmë se interpretimi për mandatin e Holta Zaçes, kalon edhe nga interpretimi për të paktën një anëtar tjetër të Gjykatës Kushtetuese.

Në emër të një rrotacioni (të cilit me shumë gjasë i kanë kaluar afatet kushtetuese), po kërkohet që të përfundojë qëllimi i shpallur herët nga banda e drejtësisë. Është emërimi i Ardian Dvoranit si kryetar i Gjykatës Kushtetuese.

Për këtë nuk mund të shfrytezohej karrigia bosh e Elsa Toskës, e cila u zbraz qëllimisht që karrigia e Holta Zaçes të mos ndihej e vetmja e boshatisur. Fundja s'ka rrotacion me 1 karrige bosh!

Në funksion të skemës shkon edhe fakti që Sokol Sadushi në 1 janar 2025 merr karrigen e kryetarit të KED. Dhe në "teknikën" e konsoliduar tashmë të KED, për 3 karrige bosh, nxirren fitues 3 kandidatura, të listuara 3 herë për secilin vend. Kështu të tria kandidaturat i filtron banda e drejtësisë. As Kuvendi, as Gjykata e Lartë, as Presidenti.

Institucionet vihen përpara faktit të kryer: "zgjidh kë të duash, del ai që kemi zgjedhur ne"!

Sokol Sadushi përhapi në media një letër të aplikimit të zonjës Zaçe me të cilën deshi të thoshte që zonja Zaçe e paska ditur që mandati i saj mbaronte në 2025.

Epo mirë!

Zonja Zaçe s'paska të drejtë të ndërrojë mendje?

Edhe Sokol Sadushi e mori postin me një rrogë që ishte sa gjysma e asaj që ka sot. Thjesht rrugës Sadushi pa që nuk i dilte rroga dhe kërkoi dyfishin!

Edhe Sadushi e ka mandatin si gjyqtar i Gjykatës së Lartë me afat të përcaktuar (dhe për atë afat për fat s'ka as debate), por kjo nuk ka ndaluar të kërkojë me shkrim dhe zyrtarisht, që ai pra Sadushi dhe të ngjashmit e tij në Gjykatën e Lartë, ta mbajnë atë post për gjithë jetën. Dhe jo kur t'u mbarojë mandati, apo kur të mbushin moshën e pensionit.

Rrotacioni në Gjykatën e Lartë duhet të presë që Sadushi të ndërrojë jetë (sepse as mosha e pensionit 70 vjeç nuk i mjafton).

Ky i apasionuari pas rrotacionit të Gjykatës Kushtetuese, kur vjen puna te karrigia e tij kërkon stanjacion deri në dekompozim.

Duke qenë të bindur se lufta për parimet e Sokol Sadushit, ka objektiv të qartë rrotacionin e interesave të bandës që po menaxhon emërimet në drejtësi, po shikojmë me interes pozicionin e Kryeministrit në gjithë këtë pocaqi interpretimesh që ka zhgarravitur si fillim Gjykatën Kushtetuese dhe Gjykatën e Lartë.

Për të kuptuar sa parimor është synimi i Sadushit dhe sa i dhimbset atij zbatimi i dispozitave të drejtësisë, ju kujtojme se si fshiu... këpucët Sadushi me nenin që i ndalonte atij personalisht marrjen e posteve në drejtësi.

Pastaj merremi me një juriste të mjerë, që gjithë jetën e vet na paskësh punuar me legjislacionin për të drejtat e fëmijëve dhe papritur, megjithëse nuk plotësonte as kriterin e vjetërsisë në profesion, Sokol Sadushi i bëri qokë duke e çuar përkohësisht në Gjykatën Kushtetuese.

Sadushi tani që ka një plan "rrotacioni" po i tundka të gjorës një letër aplikimi për karrigen ku e uli, pasi vetë Sadushi ka grisur gjysmën e dispozitave që të ulet në karrigen e gjyqtarit të Gjykatës së Larte. Bile po kërkon të grisë edhe ca të tjera, që atë karrige ta mbajë për gjithë jetën.

Atë karrige nga ku sot po kërkon t'u japë drejtësi shqiptarëve, derisa vdekja t'i shpëtojë prej tij./ CNA





Lajmet e fundit nga