A do ta shkarkojë Rama, Erion Veliajn?

10 Shkurt 2025, 17:33, Politikë CNA

Sot GJKKO ka dhënë urdhër për arrestimin e Erion Veliajn pas gjithë hetimeve që janë kryer ndaj tij ku është konstatuar se është i përfshirë në korrupsion, fshehje pasurie, pastrim parash.

Akuzat që ka publikuar SPAK e nxijnë Erion Veliajn, bashkëshorten dhe bashkëpunëtorët e tij që kanë vjedhur para publike.

Në deklaratën e tij të fundit, Rama shprehej se mediat po linconin Erion Veliajn dhe po i cenonin familjen, por në fakt të gjitha akuzat ndaj tij qëndrojnë sipas SPAK.

Por kryeministri Edi Rama ka bërë një tjetër deklaratë ku shprehej se:

“Dua të jemi i qartë me ju te kjo 'ne'-ja e PS-së nuk do të ketë, sa të jem unë i besuari juaj, një 'ne' të njëjtë, sikur bëjmë betejat dhe punët për të cilat na kanë besuar shumica e shiptarëve, sikur për këdo prej nesh që tradhton ata që na kanë besuar duke flirtuar me armikun e shpallur të kësaj lufte, i cili është korrupsioni.

Kush flirton me atë armik, kush i tradhton besimtarët tanë, kush i tradhton njerëzit që i kanë dhënë privilegjin secilit prej nesh për të qenë përgjegjës, nuk është as ne, nuk është as i yni dhe nuk ka punë me ne.

Ashtu sikur dikush që është zgjedhur në krye të një bashkie, nëse fut duart në arkat e këtij shteti dhe xhepat e këtij populli, nuk është ne.

Nuk ka se si të jetë ne dhe as se si të kërkojë gjë tjetër nga ne përveç përbuzjes.

E thënë ndryshe, çdo anëtar i kësaj familjeje politike që bën korrupsionin në funksionet publike është një tradhtar i dyfishtë, jo vetëm i popullit shqiptar si çdo hajdut me kostum që merr çka nuk është e tij, por edhe i PS-së si çdo parazit që ushqehet me gjakun e trupit ku rritet.

Ku qëllon që fatmirësisht një hajdut dhe parazit i tillë të zbulohet nga drejtësia, i hidhur është sa të duash fakti që e kishim mes nesh, por lajmi që e kemi një parazit më pak në trupin tonë është lajm shumë i mirë”.

Po pas arrestimit të Veliajt dhe publikimit të të gjitha detajeve nga SPAK në lidhje me hetimet dhe se si janë përfshirë Veliaj, bashkëshortja e tij, biznesmenë, madje nën hetim është marrë dhe deputetja socialiste Klotilda Bushka, a do ta shkarkojë Rama kryebashkiakun?

Pasi vetë publikisht e ka thënë dhe nënvizuar se kush tradhton PS nuk ka vend në PS dhe nuk është me PS-në.

Ai do të duhej të shkarkohej nga fuksionet edhe detyrat siç ka bërë me të tjerë bashkëpunëtorë të tij që kanë shkuar përballë drejtësisë .

Por Rama nuk e ka bërë këtë me Benet Becin, Erion Veliajn dhe Edison Memollën, i cili është dënuar me burg kurse Veliaj është arrestuar sot dhe Beci po hetohet në gjendje të lirë.

Ende nuk ka një reagim të Ramës çfarë do të bëjë me Erion Veliajn, a do ta shkarkojë dhe a do të ndahet njëherë e mire prejt tij apo do të vazhdojë të tërhiqet zvarrë dhe të vazhdojë të ngelet peng i aferave dhe skandaleve të Bashkisë së Tiranës./ CNA