Pse sot është "një ditë e keqe"?!

10 Shkurt 2025, 16:18, Politikë CNA

Shumë debate, shumë akuza, hetime, media, një individ me shumë komplekse, shpesh i pështirë në luftën e tij politike, por që sot përfundoi në pranga dhe ky është Erion Veliaj.

Të gjithë po e shohin me një këndvështrim të tyrin, dikush thotë që sa mirë ia bënë, por nuk festohet kurrë kur dikujt i ndodh një fatkeqësi.

Dikush hap shampanjën, dikush ka hedhur fishekzjarrë, njerëzit janë të gëzuar me arrestimin e Erion Veliajt.

E fundit/ Arrestohet Erion Veliaj
10 Shkurt, 13:57

Pikërisht për këtë arsye sot është një "ditë e keqe", sepse gëzojnë njerëzit që iku nga Bashkia e Tiranës një i korruptuar që pritet tani t’i dalë dhe vendimi gjykatës pasi të paktën deri tani është nën akuzë.

Nga ana tjetër gëzimi po shprehet kudo, në shkrime, në qëndrime dhe ata që s’kanë besuar që kjo mund të ndodhte, sërish janë të gëzuar, prandaj është një ditë e zezë se si mund njerëzit të qëndronin indiferentë, të mos shkonin të protestonin para Bashkisë së Tiranës, të mos shkonin të reagonin të gjithë bashkë, fort, ashpër, ndaj kryebashkiakut Erion Veliaj për 1001 zullumet e tij, por të gëzojnë sot pasi e ka arrestuar SPAK-u.
Ndaj është një ditë e keqe.

VIDEO- Momenti kur Erion Veliaj shoqërohet nga oficerët e BKH-së
10 Shkurt, 14:12

Por një ditë e keqe është edhe për mediat, për të gjitha ekranet, shumicën e tyre kudo ku sulmohej SPAK-u, sidomos në mediat e opozitës, në mënyrë të turpshme, skandaloze!

Një javë më parë një emision i neveritshëm u bë kundër Altin Dumanit, si presion, si shantazh i hapur ndaj tij. Pak javë më parë bashkëshorten e kreut të SPAK-ut e ekspozoi Sali Berisha, e pështirë! Luftë politike e ndyrë, nën brez, andaj sot është një "ditë e zezë" për këtë luftë që bëhet për më shumë se 30 vite në Shqipëri, me të njëjtin standard të fëlliqur!

Ndaj sot është një "ditë e zezë", për këtë arsye, sepse ranë të gjithë!

Bashkë me Erion Veliajn ra neveria e mbetjes dhe mosreagimi i qytetarëve, mosbesimi se mund të ketë njerëz të ndershëm, se mund të ketë drejtësi që lufton krimin dhe korrupsionin, drejtësi që nuk është nën kontrollin e Ramës apo Sali Berishës dhe Ilir Metës. Prandaj sot është një "ditë e zezë", për gjithçka që ka kaluar Shqipëria, përfshirë edhe ata qytetarë që gëzojnë sot!

Veliaj vijoi propagandën gjatë arrestimit/ Publikoi aktivitetin në “Facebook” sikur të ishte “live”
10 Shkurt, 14:57

Është një "ditë e zezë" për të shkuarën, ditë në të cilën shpresohet se do të vijë edhe më shumë dritë, pikërisht për reagimin e qytetarëve, për mbështetjen ndaj drejtësisë, për shpresën se ka njerëz të ndershëm dhe se askush nuk është i paprekshëm dhe se askush nuk është pronari i shqiptarëve!

Kush sillet si i tillë dhe kush shkel ligjin, abuzon apo përfiton, merr përgjigjen para drejtësisë dhe këtë e kuptuan të gjithë.

Në këtë "ditë zezë" jo vetëm për bëmat dhe gjëmat e politikës, por për gjëmat e bëmat e medias, ama edhe vetë indiferentizmi i qytetarëve! /CNA