Po sikur Berisha të bënte zgjedhje pa opozitë?

10 Mars 2023, 20:29, Opinione Hysni Gurra

Imagjino çfarë do të ishte shkruar dhe çfarë do të kishte ndodhur nëse në 2006-ën Sali Berisha nuk do të toleronte tekën e Ramës për të mos u futur në zgjedhje.

Rama i trembur nga zgjedhjet kërkonte me arsye banale të shtynte zgjedhjet lokale, në atë që njihet si kriza e zgjedhjeve lokale 2006-2007.

Askush nuk e çoi ndërmend në atë kohë që zgjedhjet mund të zhvilloheshin pa partinë kryesore të opozitës. Askush!

Zgjedhjet u shtynë për një tekë të Edi Ramës.

As që imagjinohej që zgjedhjet të bëheshin pa opozitën.

Pa opozitën mund të organizosh votime, por jo zgjedhje.

Sot, 16 vjet më pas kemi një Edi Ramë që luan çdo gur për të mos patur forcën kryesore të opozitës në zgjedhje.

I pyetur para vendimit të gjykatës për çështjen e PD-së, foli sikur të mos kishte lidhje fare me këtë çështje.

Njeriu që ka “çarë” telefonat e gjyqtarëve dhe prokurorëve për çështje nga më banalet (si çështet e personave që vononin pagesat e faturave të dritave), njeriu që shumë njerëz sot i ruajnë mesazhet drejtuar prokurorëve për X dhe Y- hiqet si evlia para publikut.

Edhe kur pyetet sot nga gazetarët hiqet sikur nuk e ka mendjen fare se çfarë ndodh në kampin tjetër.

Rekordet janë të qarta. Një gjykatë që vepron në kundërshtim me ligjin duke mos regjistruar një vendim. Një tjetër gjykatë që kërkon të përcaktojë se kush është drejtues i opozitës, një Kryeministër që kërkon pushtet absolut.

Pasi ka konsumuar përdorimin e banditëve në zgjedhje për t’i veshur me kostum politik, pasi ka dalë lakuriq para opinionit vendas dhe të huaj me përgjimet e dosjes së Durrësit dhe Dibrës ku shteti mobilizohet për të mundur PD-në, pasi ka përdorur miliona euro për të blerë votën më 2021, pasi ka ndryshuar kodin zgjedhor para zgjedhjeve dhe në besë të amerikanëve, pasi ka përdorur banditët lokalë si në rastin e Elbasanit dhe të Durrësi, Edi Rama ka ardhur te ideja gjeniale për të copëtuar kundërshtarin jo në zgjedhje, por në institucione si gjykata apo Komisioni Zgjedhjeve.

Për Edi Ramën gjithnjë e më shumë së fundmi po flitet si autokrat. Gabim.

Për Erdogan mund të thuash ç’të duash, por jo se nuk organizon zgjedhje dhe nuk njeh votën.

Për Ramën mund të thuhet se i ka shijuar shumë periudha kur opozitën e kishte jashtë Parlamentit dhe jashtë pushteti lokal.

Nëse Berisha, as që e çonte ndërmend të hynte në zgjedhje pa opozitën, Rama nuk e çon ndërmend që zgjedhjet të zhvillohen me opozitën.