Përse Ilir Meta nuk i nxjerr edhe sot Petrit Vasilin dhe Silva Cakën të sulmojnë SPAK-un?

25 Gusht 2022, 11:41, Opinione Endri Stakaj

Përse Ilir Meta nuk i nxjerr edhe sot Petrit Vasilin dhe Silva Cakën

Foto ilustruese

Zhvillimet e ditës së djeshme nuk kanë qenë të papritura për Ilir Metën me dy mbiemra, sado që ai u përpoq të bënte të fortin, sipas instruktazheve të Shik Stërmasit, kur “trajnohej” për të qenë i forti i Pazarit të Ri.

Denoncimet e bëra mbi dy muaj më parë nga një ish-deputet për transferta të dyshimta e të padeklaruara të parave për (siç thuhet!) lobim ato ndryshe trafik influence në SHBA, natyrisht që do t’i nënshtroheshin sikundër ndodhi procedurës që parashikon ligji për raste të tilla. Dhe ligji nuk parasheh një trajtim preferencial apo të ndryshëm prej të tjerëve në rastin kur denoncimi bëhet për një ish-President.

Ajo që e bën më të rëndë problemin, është mënyra e reagimit të këtij ish-Presidentit. Gjuha prej rrugaçi ordiner jo vetëm ndaj Arben Krajës si drejtuesi i SPAK-ut, por i gjithë qendrimi ndaj institucionit të zbatimit të ligjit në këtë rast, qëndrimi ndaj sistemit dhe vetë reformës në drejtësi janë dëshmia më e qartë se përse duhen ndëshkuar njerëz të tillë, që e konsiderojnë veten të ndryshëm prej qytetarëve të thjeshtë dhe që prej pozitës së veçantë ku e vendosin veten kanë të drejtë të bëjnë edhe rrugaçin ordiner po aq sa edhe rrugaçin politik.

Çfarë bëri Arben Kraja? Thjeshtë e vetëm në respekt të procedurës kerkoi një informacion zyrtar nga institucionet e shtetit për të konfirmuar identitetin e shtetasit Ilir Meta me dy mbiemra. Ai as e akuzoi, as e kërcënoi dhe as e kanosi apo përgojoi ish-Presidentin, i cili duhet të jetë njeriu model në sjelljen ndaj institucioneve dhe në çdo detaj të shfaqjes se vet në publik.

Ndërsa, ish-Presidenti, jo vetëm u sul menjëherë kundër Arben Krajës me fyerje e kercënime ordinere të shpërndara nga bregdeti i Jalës ku gjendet një një kamping me të rinjtë e LSI-së që i ka transferuar në Partinë e Lirisë, por ndërseu me të njëjtën gjuhë edhe Petrit Vasalin e tij, por edhe Silvën e shkretë, e cila me gjuhën e shefit të vet shkruan: “Ky hetuesi i komunizmit, i ka verifikuar gjeneralitetet e tij? Ilir Rexhep Metaj ka kaluar Vetting-un e njerëzve që e kanë vlerësuar në 30 vitet e tij në politikën më aktive dhe nuk ka nevojë t’ia bëjë verifikimin Beni i komunizmit. Merru me inceneratorët Beni dhe mëso të ecësh vetë, jo me hapat e Taos dhe Edvinit që i ndërron gjeneralitetet dhe kartelat sipas volisë”.

Po mirë moj Silva, meqë je edhe juriste e re, çfarë shkelje të ligjit ka në kërkesën e Arben Krajës?

Përse u shqetësove kaq shumë nga një procedurë e thjeshtë formale? Pastaj, kush të tha ty që Arben Kraja dhe SPAK-u nuk po merren edhe me inceneratorët? Apo le të merren me inceneratorët dhe jo me këto aferat e tjera?!

Shqetësimin e shefit tënd dhe të karroqes së tij Petrit Vasili e kuptojmë, po ty çfarë të djeg që fërkohesh?!

Reagimi i Ilir Metës nxjerr edhe një herë zbuluar fytyrën e tij të vërtetë kundër zbatimit të ligjit, kundër reformës në drejtësi, kundër ndëshkueshmërisë së cilitdo që ka shkelur ligjin.

Zbythja e neveritshme që Partia e Lirisë deshmoi pas reagimit të ambasadores se SHBA në mbrojtje të Arben Krajës ndaj sulmeve të Ilir Metes me dy mbiemra, është pastaj ana komike dhe e neveritshme e hipokrizisë që vetëm njerëz të pafytyrë mund të kenë paturpësinë ta bëjnë.

Ilir Meta me dy mbiemra duhet të merret i pandehur vetem per sjelljen e djeshme krejt të papërgjegjshme dhe ta mësojë një herë e mirë se në këtë vend ka ikur njëherë e përgjithmonë koha e rrugaçërisë kundër ligjit.

Ta mësojë ai, por ta mësojnë edhe Silvat e Silvanat e partisë që përdoren paturpësisht për të sulmuar institucionet e shtetit dhe të ligjit e të mos kafshojnë gjuhën e të heshtin si frikacakë vetem e vetem ngaqë reagoi menjëherë zonja ambasadore e SHBA në Tiranë.

Qendrimet e djeshme me dy fytyra janë në fakt pamja reale e Ilir Metës me dy mbiemra dhe e njerëzve të përdorur prej tij, të cilët tanime i njeh shumë mirë i gjithë populli. Por ajo që populli pret është fundi i pandëshkueshmërisë./ CNA.al