E fundit!

20:46 Kosova & Bota

Pamjet apokaliptike/ Zjarr pranë Costa Brava-s në Spanjë, izolohen më shumë se 10 komunitete

Një zjarr i madh shpërtheu sot pranë destinacionit turisti...

PATRONAZHISTI DHE NEOMALËSORJA

3 Korrik 2026, 19:28, Opinione Luan Rama

Marjanën – neomalësoren – (se ashtu njihej më parë deputetja që u largua nga tufa), e cila qe bërë e njohur prej grigjës së qingjave që i kulloste e i rriste në fshatin e saj të lindjes, në zonën e Dukagjinit, është dhënë porosi që disa të zgjedhur nga kopeja e patronazhistëve ta ndjekin e ta markojnë për çdo veprim që bën dhe për çdo fjalë që thotë.

Falë “armikut” më të ri të zbuluar, ALGORITMIT, komentet e patronazhistëve shpërndahen gjithkund.

Më të shumtët, dihet, i kërkojnë të dorëzojë mandatin e deputetes, me kinse argumentin se atë ia ka dhënë partia, nuk e ka fituar vetë.

Kur KRYETARI e vuri Marjanën që t’i printe listës së mbyllur të partisë, këta kokëboshët trutharë e servilë, nuk folën asnjë fjalë, edhe pse tinëzash nuk lanë gjë pa thënë për të.

Ata e dinin se Marjana nuk kishte asnjë lidhje, asnjë kontribut e asnjë meritë për të qenë e para në listën e partisë, por mbyllën sytë e gojën.
Sepse ashtu donte KRYETARI.

Duartrokitën e brohoritën.
Për KRYETARIN.
Edhe për Marjanën.

Mirëpo, tani që Marjana neomalësore iku prej tyre, çfarë nuk thonë, pushtësisht e poshtërsisht, siç e kanë për soj.

Njërin ndër ta e kam njohur. Dikur. Shumë kohë më parë.
Në shekullin e kaluar.

E kisha harruar.
Madje, e dija të vdekur.

Por qenka gjallë.
Gjallë dhe i angazhuar. Patronazhist.

Ka qenë i pagojë.
I pazë.
Dhe i pagjurmë.

I tillë gjithmonë.
Një lloj njeriu hibrid.
Njerivemje.

Një mik i hershëm i imi e përdorte.
Për gjithçka e gjithkund.
Thoshte, jo pa mburrje, se e kam ushtar të bindur.
Dhe i bindej vërtet.
I shërbente.
Verbërisht.

Më dhimbsej.
Ndieja keqardhje.
I thoja shpesh mikut tim që të mos e përdorte në atë mënyrë. Ishte poshtëruese.
Më thoshte se atij i pëlqen të përdoret. Ka zgjedhur vetë.

Dhe e vërteta është që ai njeriuvemje shërbëtorin e bënte me kënaqësi.

Thatak e fyryrëflashkët.
Kështu e kam njohur e kështu ka mbetur.
I gjatë dhe me pak kurriz të dalë.

Vetëm hynte e dilte.
Në fakt, më shumë dilte se hynte.
Si hije.
Hije ishte.
Hije mbeti.

Tani është hija që i është qepur Marjanës.
Nuk i ndahet.
Këmbë pas këmbe e fjalë pas fjale.

Patronazhist i denjë.
I pëgërë.

Mos më pyesni për emrin.
Sepse nuk ka emër.
Në fakt, asnjëherë nuk ka pasur emër…