LEXO PA REKLAMA!

SHKARKO APP

App Store
Google Play

Orkestra e Ushtrisë tërbon Kikon, zbardhet letra urgjente

20 Janar 2023, 20:46, Opinione Lutfi Dervishi
Orkestra e Ushtrisë tërbon Kikon, zbardhet letra urgjente
Foto ilustruese

Kiko nuk ka televizor qysh nga koha kur raca njerëzore dëboi prej kutisë katrore të gjithë majmunët për t’i zënë çdo kolltuk dhe për të folur si ata e në emër të tyre.

Gjithsesi, ai mund informohet nga shumë turistë që ndalen para tij ashtu siç bënin në antikitet njerëzit para këmbëve të Diogjenit të famshëm për të blerë mençuri.

Së fundmi, ai u njoh nga kalimtarët me lajmin se nga “Pako e Madhe” kishte përfituar edhe orkestra simfonike e Ushtrisë Shqiptare.

Në fillim, e quajti fake news, lajm të trashë dhe të sajuar nga armiqtë e brendshëm (opozita) dhe të jashtëm të Shqipërisë (ata që bëjnë ndonjë kritikë për qeverinë).

Për këtë ai e kishte edhe një linjë logjike që e ndau me të tjerët:

“Orkestër nuk ka ushtria e Shteteve të Bashkuara, Gjermanisë, Francës… Madje-madje, as ushtria e Kinës nuk ka orkestër. Për çfarë duhet orkestra në ushtri? Këngë i thuren fitoreve, ne të vetmen luftë që bëjmë është me zjarrin dhe atë e humbasim çdo vit. Mos vallë po kopjojnë korin e Ushtrisë së Kuqe të Rusisë?”- tha Kiko dhe aty për aty i erdhi ndër mend se ky lajm mund të ishte financuar me rubla ruse për të dëmtuar punën e pa lodhur të qeverisë në shërbim të njerëzve, atyre për të cilët #skaKohëPërPushim.

Akoma pa mbaruar fjalitë, bashkëbiseduesit i treguan postimin e qeverisë të cilin pasi e lexoi ju duk sikur të gjitha trompat i kumbuan mbi kokë.

Vuri putrat mbi kokë dhe klithi sa i iku zëri.

“Ushtria jonë nuk ka avionë, raketa, tanqe, helikopterë për të shuar zjarret por paska orkestër simfonike?  Mos vallë violinat, violiçelët, flauti, oboet, xhezi, janë armë të shkatërrimit në masë? Kjo është njëlloj si ne majmunët të mos blinim bananet për të cilat kemi nevojë por të paguajmë Dashnor Dikon të na këndojë këngën e Bananes. Mirë që paskan orkestër simfonike, po pse nuk e mbajnë sekret?!”, pyeti veten Kiko.

Atë nuk e qetësoi as mendimi se ndoshta është taktikë e Ushtrisë Shqiptare që të vërë armikun në gjumë me muzikë simfonike.

Nga historia e shtetit shqiptar i erdhi ndërmend rasti i kryeministrit Fan Noli që në momentet më të vështira të qeverisë së tij i binte flautit për shtatë palë qejfe dhe këndonte psalme.

Për t’u qetësuar sadopak Kiko vendosi të shkruaj qenit Sadik të Forcave Mbrojtëse të Kosovës. Po po, ju drejtua me një letër të hapur pikërisht qenit që ndihmoi në gjetjen e shqiptarëve të mbetura nën rrënojat e tërmetit në Thumanë dhe Durrës.

Dorën në zemër, por Kikos i kishte mbetur hatri për dekoratën e lartë që mori qeni Sadik.

Dekorata ishte shkaku që Kiko vendosi të shkruaj qenit besnik me emrin Sadik.

Fort i nderuari katërkëmbësh,

Uroj dhe shpresoj të keni qenë mirë aty se këtu tek ne edhe qentë s’po i lenë të lehin më, gjithashtu është monopolizuar. Mund të lehin veç ata që marrin leje, ata që paguhen me vakte të gatshme, apo edhe ata që sigurojnë ndonjë kolibe të ngrohtë. Po ashtu ka edhe nga ata që lehin bashkë me pronarin në të njëjtin rritëm dhe kjo tashmë po bëhet e modës.

Gjithsesi për tjetër gjë të shkruaj nga Saranda e bukur. Dua të të adresoj lutjen që të ndërhyni me rekomandim tek autoritetet e larta në Tiranë për të më dhënë një dekoratë durimi.

Ju jeni dekoruar me të drejtë se i keni rrëmbyer vdekjes nga thonjtë jetën e disa shqiptarëve të pafajshëm. Të njëjtën gjë meritoj edhe unë pasi modestisht po të them se duhet të nderohem me motivacionin për durimin e madh që po tregoj çdo ditë kur dëgjoj lajme si ky që orkestra ushtrisë e mori pjesën e vet nga “Pako e Madhe” magjike.

Ky vend, i dashur qen, është kthyer në komedi megjithëse askush nuk po qesh më. Në fillim mendova se “situata ishte e serioze, por jo pa shpresë”, tani mendoj se “situata është e pa shpresë, por jo serioze”. Situatat janë të tilla që jo vetëm njerëzit, por as unë nuk di çfarë të bëj:

Të qesh?

Të qaj?

Të qeshqaj?

Trilemë e vërtetë!

Shënim pas letrës:  Ashtu si orkestra, më 16 Janar 1967 u themelua edhe estrada e ushtrisë. Fatmirësisht u shkri sepse s’ka nevojë, estradë tashmë ka kudo, na mungon vetëm buzëqeshja!

20:41 Opinione Lutfi Dervishi

Presidenti takon shefin

Mirë se erdhe shef! Faleminderit që e nise ditën me mu...

Lajmet e fundit nga