E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Mallëngjimi i proamerikanëve me Gledisin

1 Shtator 2022, 22:19, Opinione Ermal Mulosmani

Mallëngjimi i proamerikanëve me Gledisin

Gledis Nano

Ka plasë një valë e madhe mallëngjimi opozitar për largimin e Gledis Nanos. Medemek po përplaset Rama me amerikanët dhe ky është fundi i tij (Ramës). Mirë këta amerikonët e Bashës që kërkojnë gjilpërën në kashtë për të gjetur fundin e “Trekëndëshit të Bermudës” por edhe Berisha i ishte bërë krah sot. Thoshte se, medemek ky paska zbulu aferat e Olsit dhe Çuçit dhe prandaj e kanë heqë… Le bre Salë, ky përdëllimi proamerikan nuk të shkon. Nuk do kesh as përfitim në fund...

Këta të parët (shumë prej tyre miq të mirë të mi) kanë nxjerrë teorinë se Nano paska pasë një urdhër arresti nga SPAK për dy ish ministra të PS-së (Arben Ahmetaj, Damian Gjiknuri) dhe ka kërcënuar Ramën se do t’i arrestojë prandaj është heqë nga puna…

Tani le ta supozojmë një moment se kjo tezë është e vërtetë. Pra, urdhri nga SPAK-u ka ardhë dhe nuk është zbatuar. Kush është fajtori këtu? Nëse kjo është e vërtetë Gledis Nano është për burg. Si guxon kryepolici të mos ekzekutojë urdhrin e Kryeprokurorit? Pra kjo si tezë, sipas meje ëshët qesharake.

Nga ana tjetër, si nuk e thotë dikush prej tyre që dështimi i policisë në këto dy muaj ka qenë spektakolar! Duheshin shkarkuar jo vetëm Drejtori i Përgjithshëm i Policisë por edhe Ministri i Brendshëm e nja 10 Drejtorë Policie qarqesh e shefa komisariatesh! Si more ditën për diell, vriten në autostradë kombëtare 3 të rinj të pasuar me një tjetër në mes të qytetit pa bërë 4 ditë? Si mund të deklarohet se një trupë speciale, paralele me shtetin, i organizon dhe ekzekuton këto atentate nën hundën e Policisë së Shtetit? Si mundet që emri më i njohur i botës së krimit, i shpallur në kërkim si një nga personat më të rrezikshëm në vend, zhduket a merret peng dhe policia nuk jep asnjë deklaratë për fatin e tij tri javë pas ngjarjes? I vetmi zbulim i bërë publik është se një polic ka qenë shoqëruesi, shoferi dhe bodiguardi i të shumëkërkuarit.

Si ka mundësi që një shef policie në detyrë, pasi është akuzuar si favorizues për trafik narkotikësh, kapardiset majë skafesh në breg të detit dhe vret një fëmijë të pafajshëm vetëm 5 metër larg bregut, në dorën e babait të saj, dhe Drejtori I Policisë të rrijë në detyrë?

Prandja kur flasim se a ka arsye për shkarkimin e Gledis Nanos të gjithë e kuptojmë se ka sa të duash. Krimi është në lulëzim dhe nuk mundet të lulëzojë edhe krimi edhe Gledisi. Ai mund të ketë qenë në rregull me amerikonët por ka qenë në deficit të madh me shqiptarët. Ikja e tij ka qenë e merituar.