LEXO PA REKLAMA!

SHKARKO APP

Ku po shkojmë shoku kapter?

26 Shtator 2022, 22:43, Opinione Armir Shkurti
Ku po shkojmë shoku kapter?
Foto ilustruese

Është batutë e filmit “Dueli i Heshtur”.  Kam kaq muaj që ia bëj heshtur dhe hapur Doktor Sali Berishës: “Ku po na çon Doktor”?

Në një takim me "shoqërinë civile", ku një seri rastësishë e doemosdoshmërishë e solli të jem edhe unë, i sugjerova faqe kamerave Berishës një platforme. Do të thotë: KU DO TË NA ÇOSH?

Do të kish qenë nder i madh për mua fakti që fjalët e mia Sali Berisha i shënoi në një bllok, sikur të mos isha i ndërgjegjshëm se ai e di shumë më mirë se unë dhe se shumë të tjerë se teorikisht, e para gjë që duhet është një platformë. Në të do të paraqitej rruga për ringritjen e PD - së dhe çuarjen në zgjedhjet lokale 2023 dhe ato kombëtare në 2025 (nëse nuk ka ndonjë projekt më afatshkurtër ai dhe grupimi i tij)

Pse platforma?

Qoftë edhe babai kur hyn në shtëpi e u thotë fëmijëve "çohuni e vishuni" u tregon më pas se ku do të shkojnë, si do të shkojnë , pse do të shkojnë, sa do të qëndrojnë etj. Në këtë mënyrë familja di se si të bëhet gati, se si të vishet, se çfarë të marrë me vete etj. Veç Krishti e Sali Berisha kanë thënë "lini gjithçka e më ndiqni mua"! Pa ditur as se ku do të mbërrijmë, as cili është qëllimi (përveç atij "heqim Ramën e marrim pushtetin"), as si do të shkohet deri aty, as se çfarë çmimi ka , as nga ç'rrugë do të kalohet. Aq më pak dimë e ç'do të bëhet me PD - në? ....

Pse jo platforma?

Pra, pse mendoj unë se Berisha nuk na ka paraqitur ndonjëherë ndonjë platformë?

E kam thënë shumë herët: Doktori ka humbur "trenin" e parafundit në 26 prill. Kur Basha deklaronte "fitore" dhe gjithë elektorati qe mpirë nga habia (ca e qeshnin e ca po pëllcisnin) Saliu nuk doli të na thotë: "Shqiptarë, demokratë! Rama fitoi dhe përgjegjës është Basha". Ndërsa "treni" i fundit ishte qershori 2021. Pas humbjes së 25 prillit Lulzim Basha shpalli zgjedhjet në PD, zgjedhje të cilat ai i fitoi me mbi 80%. As për mënyrën se si u shpallën këto zgjedhje, as për fushatën, as për kandidatët e as për rezultatin Sali Berisha nuk u investua.

...Doktori u bë i gjallë vetëm pasi SHBA e shpalli non grata dhe në shtator Luli e përjashtoi nga grupi parlamentar i PD - së.

Demokratët e prosvalur dhe gjithë shqiptarët e shtypur e nëpërkëmbur nga Rama nxituan të besojnë se "baba" u kthye për të marrë hak e për të vënë drejtësi. Pyetjes "a nuk mendon se ai po e bën thjesht për b*thën e vet?" i përgjigjeshin me pragmatizmin vrastar të shqiptarit oportunist, gati të jetojë me padrejtësi e dhunë, veç ti shkojë drejt tymi i vet: "Po mirë mo! Do ta mbrojë veten dhe familjen ai. Por, a na bëhet mirë ne që të heqë Lulin dhe Edin"?

por Saliu e shpalli herët platformën e vet. E kur them e vet në kuptimin me privat të mundshëm.

Kjo ndodhi në 11 dhjetor '21, në Stadiumin Air Albania, me demonstrimin e asaj që u quajt "Kuvendi Kombëtar" dhe heqja e Bashës nga kryetar. Gjindja e ekzaltuar, duke parë stadiumin plot, u deh nga reminishencat e të shkuarës, duke krijuar iluzionin se PD u morr, demokratët janë shumicë, udhëheqësi është në formë e i vendosur, Rama do shporret , pushteti është afër dhe mundimet morën fund. Nnë stilin e Berishës, ky qe shoë në rradhë të parë për ndërkombëtarët. "Unë kam ushtarë sa të duash dhe me këta e destabilizoj kur të dua vendin"! Le të kujtojmë se stabiliteti është kriteri që mban në pushtet të parin e rradhës në Shqipëri. Ai që e garanton atë 100% , rri në fron edhe 45 vjet, pa kusht tjetër. Ai që e vendos në pikëpyetje, si fillim bëhet faktor, e më pas, në është më i zoti si paraardhësi, e zëvendëson atë.

...për këtë arsye NUK u zhgënjeva në 8 janar të këtij viti, kur njerëz të egërsuar sulmuan me qysqi, vare dhe vegla të tjera bujqësore, selinë e partisë së tyre. Një "Sali" tjetër kishte shansin ti paraqitej botës më 8 janar. Një Sali që mund ta kish rrethuar me paqe e këngë selinë e PD -së, ta mbante rrethuar me vendosmëri për ditë e netë , derisa të dilnin ata që qenë ngujuar. Por JO!! Bota duhej të merrte konfirmimin se është PO AI! Ai, që e djeg jorganin për një plesht. Që ka pas vetes ata që në foltore i dëshmonin vetmohim të tipit "marr armën për ty"! "kam shkel arrestin shtëpiak për me ardh tek ti"! "e kap kallashin me gjithë familje për ty"!

Pika 3 e kësaj platforme strikt private ishte demonstrimi numerik i popullit antiRamë. Dhe këtë e bëri në qershor të këtij viti, kur, në një takim "për të dëgjuar shoqërinë civile se si shpëtohet Shqipëria" shpalli protestën e 7 korrikut. Populli doli, bulevardi u mbush dhe kjo pikë e platformës  u krye.

Pika 4, dhe më e rëndësishmja, është një vit i plotë gjumë i opozitës. Këtë u tregoi ndërkombëtarëve Berisha nga shtatori në shtator. "Atë që Luli e bën shëmtuar, unë e bëj me klas"! I mbajti ngrehur demokratët dhe populli anti Ramë, me shpresën dhe besimin e madh se ditët e bukura do të vijnë.

A duhet të jetë “Rama ik” platforma e opozitës?

JO!! Kurrësesi JO!! Në Shqipëri është konsoliduar OLIGARKIA DHE SHOQËRIA E KONTROLLIT. Nëse heq Edi Ramën dhe e zëvendëson me Erion Veliajn, Ilir Metën, Sali Berishën, Armir Shkurtin, Skënderbeun, Hamza Kastriotin, Abraham Linkolnin e kë të duash ti, ASGJË NUK KE NDRYSHUAR!! Oligarkia e ka tashmë gjithë infrastrukturën e saj për të blerë ose eliminuar çdo pengesë.

PËR KËTË ARSYE UNË KAM KËMBËNGULUR TEK PALTFORMA

Ai që do t'ju tregojë se KU do të shkojë dhe se SI do t'ju udhëheqë deri atje, ai PO, që e meriton vëmendjen. Ai që ju thotë "Posht qeveria"! "Rama shporru"! e përralla të tjera kësodore, thjesht po jo merr vëmendjen e besimin për ta konvertuar në kohëzgjatje të tjetës së tij e të pushtetit.

Si mbyllje:

Në kushte ideale, Sali Berisha do të kishte hyrë në histori, pikërisht duke dalë nga skena politike me një platformë shpëtimi për partinë e tij dhe për Shqipërinë. Në vend të bëjë punën e Bashkimit në mëngjes me "Koha për tu zgjuar", duke u marrë me hallet komunale të qytetarëve që shkruajnë në inbox, mund të kish udhëhequr një proçes tranzicioni të PD drejt demokratizimit të vetvetes dhe një proçes politik në rang kombëtar.

EKZISTENCA APO EMRI

kam frikë se në këtë dilemë Doktorit i është dashur të zgjedhë të shpëtojë veten (dhe të vetët) duke sakrifikuar gjithçka tjetër. E gjithë rruga e tij njëvjeçare dëshmon (fatkeqësish) se e vetmja platformë është pikërisht kjo. Mbajtja në hije e "taboreve të inatosura", qenia prezent me kritikë dhe tone të egra kundër Ramës dhe premtimi për ndryshim të shpejtë të pushtetit. Kësaj loje i kanë shërbyer pastaj gjithë marifetet (që nga vula e Lulit e me rradhë)

Në këtë vit, përveç se nuk ndërtoi një rrugë për një Shqipëri ndryshe, ish kryeministri Berisha ka sjellë regres edhe në partinë e tij. Grupe e klane , që përgatiten për epokën pasDoktor, janë forcuar, organizuar dhe pozicionuar nëpër llogore, duke tretur edhe atë pakëz shpresë për një demokratizim të kësaj force politike.

Gjumë të ëmbël!

 

Lajmet e fundit nga