E fundit!

15:38 Aktualitet

Goditi protestuesin në Zvërnec/ Ndryshon masa e sigurisë për një nga punonjësit e sigurisë së kantierit

Gjykata e Apelit ka ndryshuar masën e sigurisë për një ng...

Darka e papaguar…

18 Gusht 2023, 07:30, Opinione Lutfi Dervishi

Foto ilustruese

Një darkë në restorantin e njohur Guva në Berat, prodhoi më shumë “lajme” dhe pëlqime se fletë-arrestet e SPAK-ut për 8 ish-zyrtarë të përfshirë në dosjen e sterilizimit.

Katër adoleshentë italianë, të qeshur dhe me bollëk energjish shijuan kuzhinën shqiptare, komplimentuan stafin për cilësinë dhe kur erdhi radha për të paguar u larguan fshehurazi me ngut nga restoranti. Fatura e papaguar 80 euro!

Stafi i restorantit mbeti i hutuar, jo vetëm nga largimi i beftë, por edhe nga guximi i të rinjve.

Stafi postoi një video të shkurtër në rrjetet sociale ku tregonte adoleshentët duke u larguar nga restoranti.

"Stafi ynë i uron këtyre "zotërinjve" italianë pushime të mbara dhe me lekët e PAPAGUARA në restorantin tonë bëjnë diçka të mirë!!!".

Deri këtu asgjë e jashtëzakonshme. Me shumë se humbjen financiare postimi shpreh zhgënjimin nga sjellja e adoleshentëve.

Portalet me shpejtësinë e zjarrit të korrikut në një pyll me shqopa e morën këtë “ngjarje” dhe e “zbukuruan” me tituj të bujshëm, pergjithësues e denigrues.

Rrëfimi u zhvendos me shpejtësi nga një akt minor keqbërje në një narrativë më të gjerë.

Ndërsa veprimi i të rinjve është i qortueshëm, media në vend të penelit mori në dorë një furçë të madhe për të pikturuar me tituj një popull dhe një vend të tërë dhe kë? Italinë, atdheun e 700 mijë emigrantëve shqiptarë ndër vite.

A mundet një incident i izoluar të mbushë boshllëkun me lajme të një dite të nxehtë gushti?

Mediat sociale njihen për sensin e sensacionalizmit dhe polarizimit, por portalet me ndikim në opinion mund të bënin kujdes për të mos rënë në kuthin e përgjithësimeve dhe stereotipeve.

Ndoshta vetë restoranti mund të shërbejë si katalizator për të ndrequr shijen e titujve bombastikë.

Jam kurioz nëse restoranti do të postojë “shkruajtem për 4 adoleshentë italianë dhe jo për “turistët italianë ” a do të bëhet lajm po aq viral sa videoja?

Media ka fuqinë për të formësuar perceptimet, për të ndikuar në debate dhe për të krijuar apo zhbërë stereotipet. Ndonëse akti i katër të rinjve ishte i gabuar, ai mund të jetë edhe një kujtesë se një ngjarje e vetme nuk mund të përgjithësojë njerëzit dhe vendet. Nuk mund të lidhet pylli me një litar…