E fundit!

15:42 Aktualitet

Protestuesit para selive/ Balla: Kush qëndron pas tyre e ka gabim, mund të çojnë në vëlla-përplasje

Kreu i grupit të Partisë Socialiste Taulant Balla ka kriti...

Asgjësimi social i Lushnjës

2 Maj 2023, 15:14, Opinione Ilir Levonja

Ilir Levonja

Sot lexova diku se Lushnjës nga data 1 maj i hiqet Gjykata dhe Prokuroria, i kalon në Fier. Para do viteve, me ardhjen në pushtet të PS-së iu hoq edhe universiteti.

Një përpjekje e kurorëzuar me shumë sakrifica nga intelektualët aty për rikthimin e atij filiali të kohës, si degë e Universiteti Bujqësor Kamëz. Dhe Lushnjës i takonte, për më tepër që është truall dominant në fushën e bujqësisë.

Madje kishte edhe specialistët më të mirë në vend. Ferma të mëdha, ndërmarrje frutore etj. Është në atë logjikën që miniera ndërtohen aty ku është minerali, jo atje ku shitet. Në kohën e Perandorisë Osmane, Lushnja kishte varësi nga Berati.

Tani në Perandorinë e Edi Ramës, nga Fieri. Kur pyeta një ditë për drejtorinë arsimore, më thanë se edhe atë e kanë çuar në Fier. Pyeta se si e ka emrin drejtori, më thanë, nuk e dimë, është një grua, vjen një herë në javë etj. Pa përmendur edhe këtë gjoja reformën territoriale, shkrirjen e komunave etj.

Një debilizëm social shqiptar, pasi hallet e problemet e një komune në skaj do t'i qajë kryetari i bashkisë atje në qendër. Pra, pa Gjykatë, pa Universitet, pa drejtori arsimore, shto edhe shërbime të tjera civile, nga shkrirja e zyrave të shërbimit.

Nuk kuptoj se a ndiheni gjallë. A jeni qytet i dorës së parë a i dorës së tretë? Se në atë listë shoh disa qytete që dikur kanë qenë lokalitete. Nuk kam asgjë me to, ta zëmë Kurbini në Lezhë, megjithëse forca e një shteti qëndron aty ku ngre institucione, jo ku i zeron. Apo Mati në Dibër, por jo e Lushnjës.

Nëse i referohesh popullatës, plus aktivitetit social, prodhimeve etj., Lushnja eksporton. Ka turizëm, është kryqëzim ose kërthiza mes veriut dhe jugut. Nuk ju kuptoj edhe ju lushnjarë që vazhdoni e ndiqni Taulant Ballën nëpër rrethina, na çoni video se gjoja po asfaltoni një rrugicë, se si qeshni apo përqafoheni. Nuk i kuptoj as ata qytetarë që presin Edi Ramën. Madje as ata socialiste paradoksalë që besojnë se duke arrestuar ish-kryetarin e bashkisë apo ish-nënkryetarin etj., po vini drejtësinë në vend.

Pse nuk arrestojnë atë të Durrësit apo të Elbasanit? Ju marrin mish për top se gjoja po bëjnë reforma. Nuk e pyesni një herë veten. Tjetra, kujtoni se duke i hequr Gjykatën dhe Prokurorinë qytetit tuaj, po bëni vërtet reformën në drejtësi? Jo ore jo, nuk dini se çfarë po bëni. Dhe t'ju vijë turp që qytetit të Vaçe Zelës, Ilia Shytit, Margaritës, Pavlinës, Faslliut, Halilit, Vathit.

Qytetit të shkencëtarëve të bujqësisë, veterinarisë, drufrutorëve, Alfredit, Gretës, Zhanit, Piros, Nuriut, Vladimirit etj. Jeni bërë kolerë për veten tuaj. Si i votoni? Do ngriheni nesër herët dhe rrugës për në Fier, për çfarë, për një shërbim elementar civil. Pika që nuk ju bie. Nuk e ngriti Rama, Lushnjën, e ngritët ju. Ndaj jepuni shqelma bythëve atyre që u cenojnë vlerat.