E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Ahengu që fsheh 3 drama!

14 Mars 2024, 20:36, Opinione Grigels Muçollari

Grigels Muçollari

Tirana festoi dhe zhurmoi sot në disa arterie, dhe asgjë të keqe nuk ka këtu. Edhe pse vendosja e dekorit e bllokoi trafikun në qytet që prej dje në mesditë duke shkaktuar kaos e stres urban, edhe pse dekori i bashkisë e organizimi i saj ka qëllim kryesor që kryetari të dalë mire në media, sërish atmosfera i bën mirë për një ditë qytetit.

Problemi është se ditë si kjo shfrytëzohen nga drejtuesit dhe kryebashkiaku për të mbuluar ato, jo pak gjëra, që nuk shkojnë.

Me muzikën që buçet e me skenografi në bulevard, nuk shtohet numri i shkollave, nuk pastrohet ajri kaq i ndotur e nuk reduktohet trafiku torturues, por ngulet edhe më shumë ideja sikur punët shkojnë mirë.

Festa e Bashkisë, nuk e fsheh dot një fakt dramatik tanimë.

Tirana është sot kryeqyteti i vetëm në Europë që nuk ka Teatër Kombëtar, Muze Historik Kombëtar dhe Galeri Kombëtare të Arteve. Tre godina kult dhe simbol këto, që janë shenja në identitetin e një kombi dhe pesha e rëndë e një kryeqëndre, kudo.

Ahengu që fsheh 3 drama!

Vetëm në Tiranën që është çdo vit triumfuese e ndonjë titulli ojf, si kryeqyteti i diçkaje, i sportit me gjasë së fundmi, këto tre qendra kryesore të artit, kulturës dhe historisë, janë inekzistente. Nuk funksionojnë. Nuk gjenden.

Nuk është një trill i natyres, as larg qoftë pasojë e ndonjë lufte, a bombardimi, as aksident tragjik. Eshtë kryekëput vepër e dy njerëzve, Edi Rames dhe Erjon Veliajt.

Sikur të ishte Tirana oborri i pasëm i shtëpisë së tyre ata kanë hequr me një të rënë të lapsit këto 3 institucione. Teatri është nje gërmadhe. Muzeu u shpall i mbyllur. Tek galeria ka një rrethim, dhe askush nuk hyn dot.

Asnjë sqarim, asnjë komunikim., asnjë llogaridhënie.

Vetëm ajo që çdokush e di se do të ndodhë. Që kulla e rrokaqiej do të mbijnë shumë shpejt aty ku ishte Teatri, ku ishte Muzeu, ku ishte Galeria. Trinia e shenjtë e idenitetit, e artit dhe kulturës së kombit do të zhbëhet e aty do të lindin grataçelat, që projektohen e ndahen në fshehtësi, me klientelën dhe familjen e bosit të madh.

Qytetarët mund të mbushin bulevardin Ditën e Verës, teksa pas kurrizit po u vidhet pasuria që atyre u përket.