E fundit!

12:04 Opinione Mentor Kikia

Funerali i “Investitorit Strategjik”, ligji më i zi në historinë e Parlamentit Shqiptar!

Kryeministri i Shqipërisë i premtoi Komisionit Europian se...

24 preriali i B. Q., një inteligjencë politike

3 Janar 2023, 13:35, Opinione Reshat Matjani

Jam i rafinuar, mund ta kuptoni dhe vetë.

Jam inteligjent, buzëhollë, u bëj naze edhe havjarit, midhjes dhe atij lloj gatimi që frëngjisht quhet "truffes à la Cussy". Preferoj verërat e rralla dhe të shtrenjta: Château Latour, Johannisberger, Romané-Conti. Vetëm se shampanja më pëlqen pakëz e ngrohur. Pjeshkën e prek vetëm të mbuluar me këmishë, o Zot sa i rafinuar që jam.

Gjakim për pushtet nuk kam aspak. Gjithçka e bëj për të varfërit. Të varfrit, ata dua t'i kem që të gjithë për vete, t'i rrok të gjithë në një përqafim të ngrohtë e lektisës marksian - vini re mirë, marksian e jo marksist - e t'i mbys me dashurinë time kaba, ama që buron thellë nga shpirti. Më votoni, se boza, hallva dhe qebapi nuk do ju mungojnë kurrë.

Nëse më shihni të shtrëngoj nofullat, këtë e bëj vetëm e vetëm që të ndrydh turrat e mëdha të ligjërimit politik (ndër mend më vjen Marri, kryegjuhëtar i dorës së parë i epokës sovjetike, bythëlëpirës që prozën e Stalinit e quante "të saktë, tingullore e plot kuptime").

I tillë është edhe ligjërimi im politik. Se që ta dini, çdo gjë, edhe vetë gjuha ka një origjinë të bazuar te lufta e klasave. Ka një gjuhë të të varfërve dhe një gjuhë të të pasurve, dhe unë i flas që të dyja. Po nejse, të mos hapërdahemi me "gjëpora" - siç thoshte ati e kumbari im shpirtëror, shoku Enver Hoxha - që nuk na interesojnë (Brenda sallës ndihen ca thirrma "Lavdi, lavdi, lavdi!".

Nga ju dua thjesht pushtetin. Kisha dyshime në lidhje me atë që doja të bëja më parë, në vegjëli, të isha thjesht një eminencë gri... Shoh me trishtim se jam shndërruar thjesht në një eminencë "bezhë".

Të paktën, këtë shpresoj të arrij pasi të bëhem deputet, të shtie në dorë frenat e pushtetit... eh, me pushtetin, dihet vijnë edhe femrat e bukura dhe paratë. Eh, femrat... pasioni tjetër i jetës sime përveç pushtetit.

Po të më shihni, jam alamet hamshori, jam djalë i pashëm që thoni ju dhe femra shqiptare do ta ketë për nder të pllenohet nga një alamet mashkulli i llojit "Albanian lover", pakëz leshtor - nën bluzë fsheh një tjetër bluzë - po kjo nuk prish punë.

Bastardët e mi do t'i rregulloj të gjithë nëpër vende kyçe, që kur unë të mos jem më në këtë botë - nuk besoj në jetën e përtejme - të jenë ata që t'ju qeverisin, t'ju kojnë atë hallvën e famshme të sipërpërmendur.

Të jenë ata që do ulen në krye të çdo tavoline, të kenë në dorë pushtetin politik, ekonomik si dhe lavdinë letrare - ju kam thënë që jam një shkrimtar i mbaruar - ndërsa ju do shërbeni si kontorno. Unë velitem shpejt nga të ngrënët dhe gjëja e vetme që ma ngacmon oreksin, janë të varfërit e uritur që më rrethojnë.

Dhe unë do kujdesem që të mbeten të tillë edhe për shumë kohë. Më shumë se një kërcënim, ky është një premtim, që unë do ta mbaj. Kuptohet, nuk do shkoj në ferr, se ferri nuk ekziston. E si mund të shkojë njeriu në një vend që nuk ekziston? Thjesht do lëpij pakëz majën e majtë të buzës, që trimat e mi të hidhen në sulm e t'i marrin një e nga një kalatë e kapitalizmit - këtij sistemi të mahisur që nuk do e nuk do të rrëzohet./CNA.al