LEXO PA REKLAMA!

SHKARKO APP

E fundit!

x

Tenori kinez: Çmimin shqiptar do ta ruaj gjithë jetën

21 Prill 2023, 10:58, Kulturë Edmond Laçi
Tenori kinez: Çmimin shqiptar do ta ruaj gjithë jetën
Chuan Wang, tenor

Edhe pse ka kaluar vetëm pak kohë, tashmë edhe në Pekin, sikurse në të gjithë globin, sallat bosh të teatrove, operave dhe koncerteve të tjera, ngjajnë një shekull larg. Megjithatë pandemia ia doli që për disa kohë të na “ndajë” jo vetëm nga eventet "live", por edhe njohja me artistët e këtij vendi kaq të madh. Natyrisht jo sa për të mos dëgjuar për të famshmin Lang Lang, pianistin më virtuoz në botë, videot e të cilit të lënë pa frymë.

E fundit, që i përket nëntorit 2022 (https://www.youtube.com/watch?v=LwE8dZRnnho&t=15s) dhe që ua dërgoj të gjithë miqve të mi, është unikale: shumë e quajnë si interpretimi që përloti Hollywood-in. Nejse.

Do t’i mbaja të fshehura historitë e mia me muzikën klasike, sikur vetëm pak ditë më parë të mos dëgjoja se pikërisht në Tiranë, në Festivalin e 19-të Ndërkombëtar të Këngëtarëve Lirikë “Marie Kraja”, fitues u shpall një tenor kinez…

Chuan Wang vrapon nga një koncert në tjetrin. Madje para se të mbërrinte në kryeqytetin shqiptar, nuk i ka mjaftuar koha as të lexojë diçka rreth Tiranës, të cilën do ta shikojë për herë të parë. Madje kohë nuk ka as për të rikuperuar zërin, të cilin e ka “harxhuar” për dhjetë netë me radhë gjatë interpretimit të Don Ramiros te “Cenerentola” e Rosinit në Teatrin Lirik të Kaljarit.

Dhe pasi ka rrëmbyer Çmimin e Parë në “Marie Kraja” vrapon sërish drejt koncertit tjetër, këtë herë në Novara për të interpretuar Kontin d’Almaviva te “Berberi i Seviljes”.  Megjithatë Tiranën, Wangu nuk do ta harrojë kurrë. “Jam i lumtur, sepse kjo herë është hera e fundit që marr pjesë në një konkurs dhe sigurisht që këtë çmim do ta mbaj me vete përgjithmonë”, - thotë Wang gjatë një interviste ekskluzive.

Por për tenorin 35-vjeçar nuk ka vetëm një arsye për ta vlerësuar shumë këtë çmim. “Më duhet të them se nuk e prisja këtë vlerësim” – thotë Wang, duke shtuar se “vitet e fundit kam marrë pjesë në mjaft konkurse, mes të cilave shumë të rëndësishme, si psh. BBC Cardiff dhe Tenor Viñas, por ky konkurs nga pikëpamja organizative dhe cilësia e garuesve ishte shumë lartë”.

Ai thotë me modesti se pjesëmarrësit, të gjithë këngëtarë të mëdhenj, kishin shansin të ishin fitues. Madje e quan suprizë vendimin për të nga ana e jurisë ndërkombëtare, e cila përbëhej nga drejtues të operave nga Londra, Parisi, Vjena, Boni, Sevilja, Sofja etj.

Por ai s’mund të “fshihet” dot, sepse tashmë i ka të gjitha “letrat” për të qenë një tenor i madh, që nga diploma e nivelit të parë për kanto në Konservatorin e Guangzhout, diplomimi me nderime në Konservatorin Giuseppe Verdi në Milano, deri te Akademia e Artistëve të Operas në “Teatro alla Scala”, ku interpretoi per tri vite radhazi.

Pikërisht në teatrin e famshëm të Milanos, Chuan Wang do dëgjonte për herë të parë për vendin e shqiponjave. “Para se të vija në Shqipëri kisha shumë kuriozitet për këtë vend, sepse mikja ime e dashur, soprano Enkeleda Kamani më fliste shpesh për bukuritë dhe për njerëzit e këtij vendi.” - tregon Wangu.

Atij i kanë bërë shumë përshtypje, “vendi shumë i bukur, deti, mali...”, ndërsa i pëlqen qyteti, kushtet e jetesës së njerëzve, për të cilët thotë se “shijojnë diellin pa u nxituar”. Për tenorin kinez shqiptarët janë të gjithë shumë të sjellshëm dhe miqësorë. “Sa keq që këtë herë nuk pata kohë të mjaftueshme për të vizituar më mirë këtë vend të bukur dhe mezi pres të kthehem përsëri”.

Sikurse për Shqipërinë, edhe për kolegët e tij shqiptarë, Wangu nuk i kursen lëvdatat. “E kisha kuptuar tashmë nga mikesha ime Enkeleda Kamani, një soprano e jashtëzakonshme, e cila me siguri do të ketë një karrierë të shkëlqyer”. Ai veçon sopranot pjesëmarrëse në këtë kompeticion Suada Gjergji dhe Juana Shtrepi, të cilat – sipas tij - “absolutisht e çojnë në majë cilësinë e këngëtarëve shqiptarë”.

Por eksperienca më e bukur për tenorin kinez është interpretimi së bashku me Eneida Tarifën, të cilën e quan një yll të pop-it.  “Ishte një nder për mua të ndaj skenën me të” – thotë Wang. Ndërsa vetë Tarifa, ndërsa i tregova për vlerësimin e tenorit kinez, më tha se Chuan Wang është vërtetë “një këngëtar i rrallë”.  Në fund Wangu – duke premtuar edhe një herë kthimin sa më shpejt në Tiranë – shton se nuk do t’i harroj as këngëtarët e tjerë të pop-it që kënduan atë mbrëmje dhe se nuk do të lodhet duke i komplimentuar këngëtarët shqiptarë. (CRI)

Lajmet e fundit nga