“GjiroClassica” sjell muzikën klasike në zemër të Gjirokastrës

23 Maj 2025, 09:51, Kulturë CNA

“GjiroClassica” sjell muzikën klasike në zemër

Artistë nga Shqipëria dhe Kosova ndezin skenën e qytetit historik.

Gjirokastra është shndërruar këto ditë në një skenë magjike muzike falë festivalit “GjiroClassica”, që po zhvillohet nga data 22 deri më 25 maj 2025 në ambientet historike të qytetit. Ky festival ndërthur muzikën klasike me atmosferën unike të Gjirokastrës, duke sjellë artistë të talentuar nga mbarë trevat shqiptare.

Në mesin e pjesëmarrësve ka spikatur Yll Haliti, një artist i ri nga Kosova, i cili interpretoi me ndjeshmëri dhe teknikë të lartë në piano, duke marrë duartrokitjet e ngrohta të publikut.

“Jam 18-vjeçar, vij nga Mitrovica, jam pianist. Merrem me piano për rreth 13 vite, muzikën e kam filluar kur kam qenë 4 vjeç. Gjatë këtyre viteve kam marrë pjesë në shumë recitale dhe koncerte. Është hera e parë që performoj në Gjirokastër”.

Krahas tij, në skenë u ngjit edhe pianistja e njohur Moza Çabeli, e cila solli një repertor të pasur klasik, ndërsa sharmi dhe interpretimi i saj i thellë prekën zemrat e të pranishmëve.

“Ishte një mbrëmje shumë e bukur me fëmijë konkurrentët, të ftuar, spektatorë. Do të ketë në vazhdimësi aktivitete të tilla, do të jenë 5 mbrëmje që do të zbresin në çdo rrugicë të qytetit”.

Organizimi i festivalit është realizuar nga Kristina Laço, e cila ka qenë frymëzuese dhe shtytëse e këtij aktiviteti që po kthehet tashmë në një traditë kulturore të qytetit.

“Festivali Gjiroklasika është edicioni që u kushtohet të rinjve të cilët kanë një histori suksesi, janë artistë të skenës shqiptare dhe jashtë saj. Sot ishim me Yllin ndërsa ditët në vijim do të jenë të tjerë artistë”.

Festivali "GjiroClassica" është jo vetëm një ngjarje artistike, por edhe një thirrje për promovimin e vlerave kulturore të Gjirokastrës, duke e bërë atë një pikëtakim të rëndësishëm për artin dhe muzikën klasike në rajon./ CNA