Dita Ndërkombëtare e Muzeve/ 5 muzetë që duhen vizituar në Shqipëri

18 Maj 2025, 21:15, Kulturë CNA

Dita Ndërkombëtare e Muzeve/ 5 muzetë që duhen vizituar

Që prej vitit 1977, çdo 18 Maj, në të gjithë botën shënohet Dita Ndërkombëtare e Muzeve. Kjo datë është vendosur nga Këshilli Ndërkombëtar i Muzeve, ICOM i UNESCO-s dhe synon të rrisë ndërgjegjësimin publik mbi rolin e muzeve në zhvillimin e shoqërisë.

Ja 5 muze që duhen vizituar në gjithë Shqipërinë:

Dita Ndërkombëtare e Muzeve/ 5 muzetë që duhen vizituar

Muzeu Historik Kombëtar është insitucioni më i rëndësishëm muzeor në Shqipëri. Ai gjendet në qendër të Tiranës, në sheshin “Skënderbej” dhe u ndërtua në vitin 1981 si shtëpia më e madhe e historisë së kombit shqiptar. Në të gjenden mbi 6200 objekteve muzeore të periudhës nga mijëvjeçari IV para Krishtit deri në gjysmën e dytë të shekullit XX. Herë pas here, ne mbientet e muzeut mbahen aktivitete të ndryshme me natyrë kulturore. Në muze mund të gjenden objekte të rëndësishme që dëshmojnë për zhvillimin e kombit shqiptar.

Dita Ndërkombëtare e Muzeve/ 5 muzetë që duhen vizituar

Shtëpia Me Gjethe u ndërtua në vitet ’30 për të funksionuar si klinikë obstetrike, por me fillimin e Luftës së Dytë Botërore, ajo ra në duart e gjermanëve dhe u shndërrua në një qendër të Gestapos. Në vitet ’50 ajo u shndërrua në degën tekniko-shkencore të Sigurimit të Shtetit (policia sekrete komuniste). Prej asaj kohe, Shtëpia me Gjethe u kthye në një legjendë të frikshme. Në vitin 2017, hapja e muzeut, u dha mundësinë shqiptarëve të shihnin për herë të parë nga afër një dimension të pazbuluar të komunistëve. Muzeu ekspozon nga afër objekte, mjedise, pajisje, rikrijime dhe imazhe të përgjimeve të Sigurimit të Shtetit, duke plotësuar një panoramë rrënqethëse të dhunimit të jetës në komunizëm.

Dita Ndërkombëtare e Muzeve/ 5 muzetë që duhen vizituar

Muzeu Kombëtar i Arsimit në Korçë ndodhet në ndërtesën e shkollës së parë shqipe, e hapur më 7 mars 1887 nga mësuesi patriot Pandeli Sotiri. Ky objekt, i cili fillimisht ishte shtëpi private e patriotit korçar Diamant Terpo, nga viti 1967 gëzon statusin Muze Kombëtar i Arsimit ndërsa nga viti 1973 është shpallur edhe Monument Kulture.

Dita Ndërkombëtare e Muzeve/ 5 muzetë që duhen vizituar

Muzeu Arkeologjik i Durrësit u hap më 13 Mars 1951 në qytetin Durrësit dhe është një nga muzetë më të rëndësishëm në Shqipëri. Pjesa më e madhe e muzeut përbëhet nga 3204 objekte që gjenden në vendin e lashtë të Dyrrhachium dhe përfshin një koleksion të gjerë nga periudha Greke e Lashtë, Helenistike dhe Romake. Artifaktet kryesore përfshijnë stelat e funeralit romak dhe sarkofagët prej guri dhe një koleksion prej bustesh miniaturë të Venusit, dëshmi për kohën kur Durrësi ishte një qendër adhurimi e perëndeshës.

Dita Ndërkombëtare e Muzeve/ 5 muzetë që duhen vizituar

Muzeu Kombëtar Gjergj Kastrioti Skënderbeu ndodhet në Krujë dhe është një nga më të vizituarit në Shqipëri. Në këtë muze janë të ekspozuara mjaft objekte, dokumente dhe bibliografi origjinale, riprodhime autentike që flasin qartë për historinë e popullit shqiptar në shek. XV e më gjerë. Aty numërohen pavione të tilla si pavioni i antikitetit dhe mesjetës së hershme, pavioni i principatave shqiptare, i pushtimit osman dhe përballimit të këtij pushtimi, pavioni i kështjellave mesjetare, i qëndresës shqiptare, kanceleria e Skënderbeut, biblioteka, salla e princave, e pinakotekës dhe së fundi pavioni i trashëgimisë dhe i jehonës. Në këto pavione janë ekspozuar objekte prej qeramike, bronxi, hekuri, bakri, faksimile të ndryshme, ikona origjinale, shkrime, këmbana e vitit 1462, shpata origjinale të shek. XV etj./CNA