80 vite pa Faik Konicën/ Bujar Leskaj: Figurë qendrore dhe pikë referimi për kulturën

15 Dhjetor 2022, 17:51, Kulturë CNA

80 vite pa Faik Konicën/ Bujar Leskaj: Figurë qendrore dhe pikë

Deputeti i Partisë Demokratike, Bujar Leskaj

Deputeti i Partisë Demokratike, Bujar Leskaj, ka përkujtuar Faik Konicën në 80 vjetorin e ndarjes së tij nga jeta.

Me anë të një statusi në rrjetet sociale, Leskaj thotë se Konica është një nga figurat më të shquara intelektuale shqiptare, shkrimtar, kritik letrar, publicist, eseist, përkthyes, një nga personalitet më të shquara të kulturës, letërsisë, e jetës politike shqiptare, një intelektual i dimensioneve botërore.

Ai thekson se Konica mbetet një figurë qendrore dhe një pikë referimi në ecurinë e kulturës sonë moderne.

Statusi i plotë:

Sot mbushen 80 vite nga vdekja e Faik Konicës, një nga figurat më të shquara intelektuale shqiptare, shkrimtar, kritik letrar, publicist, eseist, përkthyes, një nga personalitet më të shquara të kulturës, letërsisë, e jetës politike shqiptare, një intelektual i dimensioneve botërore.

Faik Konica mbetet një figurë qendrore dhe një pikë referimi në ecurinë e kulturës sonë moderne.

Faik bej Konica lindi më 15 mars 1875 në Konicë.

Ndoqi Kolegjin Jezuit Saverian të Shkodrës e më pas studimet e liceut perandorak francez të Stambollit. Pasi kreu shkollën e mesme në Francë, vazhdoi studimet në Dizhon për filologji romane dhe më pas u diplomua në universitetin e Harvardit të SHBA-së, ku mori gradën “Master of Arts”.

80 vite pa Faik Konicën/ Bujar Leskaj: Figurë qendrore dhe pikë

Më 1897, vetëm 23 vjeç, në Bruksel botoi numrin e parë të revistës politike kulturore e letrare “Albania”. Pas vajtjes së tij në Boston, së bashku me Fan Nolin, themelojnë gazetën Dielli, një organ i rëndësishëm i Federatës Panshqiptare “Vatra”.

Në 1912 në emër të Federatës Vatra, shkon në Londër për të mbrojtur interesat kombëtare shqiptare në Konferencën e Ambasadorëve në Londër.

Në 1921, Konica zgjidhet kryetar i Federatës Vatra dhe me rimarrjen e drejtimit të gazetës Dielli, ai shkruante në një rubrikë të tijën “Shtylla e Konitzës”.

Në vitin 1926, Faik Konica emërohet Ministër Fuqiplotë i Shqipërisë në Shtetet e Bashkuara. Vdiq në Uashington më 15 Dhjetor 1942. Në xhep kishte vetëm 15 dollarë e 56 cent.

Jeta e tij kaloi përmes tallazesh të shumta. I ndaluar për rreth 46 vite, i anatemuar e i përbuzur nga diktatura komuniste, Faik Konica rezistoi për të qenë gur themeli i mendimit kritik shqiptar.

Në vitin 1995, pas rënies së diktaturës komuniste, eshtrat e tij u sollën në Tiranë.

Me veprën e tij letrare e me shkrimet kritike, Konica pasqyron një njohje të thellë të mendësisë shqiptare, e jetës politike shqiptare.

Gjatë gjithë jetës e veprimtarisë së tij intelektuale e atdhetare, ai është përpjekur për një gjuhë letrare të përbashkët duke ndihmuar në pasurimin e zhvillimit të stilit letrar dhe publicistik të shqipes së shkruar.

Kritik, antikonformist, intelektual i formuar, për asnjë çast nuk tradhtoi bindjet dhe mendimet e tij./ B.A. - CNA.al