web counter
LEXO PA REKLAMA!

SHKARKO APP

App Store
Google Play

Kush është Ani Begaj/ I shumëkërkuari për "masakrën e Çoles", dënuar me 35 vite burg

7 Korrik 2022, 16:28, Kronika CNA
Kush është Ani Begaj/ I shumëkërkuari për
Tre autorët e "masakrës së Çoles"

Ani Begaj, personi i arrestuar sot nga policia, ishte shpallur në kërkim prej kohësh, pasi rezulton i dënuar me 35 vite burgim për një vrasje të dyfishtë.

27-vjeçari është dënuar si autor i përplasjes së përgjakshme me armë, që njihet ndryshe si “masakra e Çoles”.

Gjykata e Apelit Vlorë, e ka dënuar në 2016-ën me 35 vite burgim, për veprat penale "Vrasja në rrethana cilësuese", kryer në bashkëpunim dhe "Armëmbajtja pa leje".

Ngjarja u regjistrua më datë 7 prill të 2015-ës, në lagjen "24 Maji", të Vlorës. Gjithçka nisi me një zënkë mes disa të rinjve pas një feste ditëlindjeje dhe përfundoi në një masakër me tri viktima.

Konkretisht nga përplasja me armë humbën jetën Haki Rakipi, Alfred Velaj dhe Albi Limaj. Policia arrestoi si autorë të masakrës Aleksandër Llanajn, Ani Begajn dhe Bertil Aliajn, njëri i dënuar me burgim të përjetshëm dhe dy të tjerë me nga 35 vite burg.

Kush është Ani Begaj/ I shumëkërkuari për
Arrestimi sot i Ani Begajt

Kjo masakër u pasua nga një tjetër përplasje. Në tetor 2017, tre anëtarë të familjes Llanaj u plagosën në zonën e Transballkanikes, pranë qendrës së Vlorës. Shënjestra ishte Ferdinand Llanaj, vëllai i të dënuarit përjetë asokohe, Aleksandër Llanaj. Bashkë me Ferdinandin, në këtë atentat u plagos edhe djali i tij 8-vjeçar, si edhe miku i familjes, Dritan Begaj.

Ndërkohë, sot Ani Begaj u vu në pranga së bashku me kushëririn që e shoqëronte dhe ruante, Elton Begajn.

Pasi u lokalizuan nga policia, ata kanë injoruar sinjalin e ndalimit dhe kanë vazhduar lëvizjen me shpejtësi, duke rrezikuar jetën e punonjësve të Policisë dhe të përdoruesve të tjerë të rrugës.

Gjatë kontrollit fizik, kushëririt 26-vjeçar iu gjet një armë zjarri pistoletë dhe 1 krehër me municion luftarak, të cilët u sekuestruan në cilësinë e provës materiale, së bashku me automjetin./ B.A. – CNA.al





Lajmet e fundit nga