Zjarr në qendrën kulturore bullgare në Manastir

4 Qershor 2022, 15:39, Kosova & Bota CNA

Zjarr në qendrën kulturore bullgare në Manastir

Qendra kulturore bullgare në qytetin e Manastirit

Qendra kulturore bullgare në qytetin e Manastirit, në Maqedoninë e Veriut është përfshirë nga flakët flakë të shtunën në mëngjes. Ende nuk dihet se kush e shkaktoi zjarrin. Porta hyrëse e qendrës me mbishkrimin “Vanço Mihajlov” është djegur, ndërkohë që brenda objektit nuk janë shkaktuar dëme.

Përfaqësuesit e qendrës i thanë medias lokale se zjarri kishte shpërthyer në orën pesë të mëngjesit dhe fqinjët kishin njoftuar zjarrfikësit, të cilët e kishin shuar zjarrin duke penguar përhapjen në pjesët tjera të shtëpisë.

Organet hetuese kanë bërë ekspertizën, teksa nuk ka njoftime zyrtare mbi shkaqet apo motivet e zjarrit.

Qendra kulturore bullgare që mban emrin e Vanço Mihajlovit, u hap para disa javësh në qytetin e Manastirit gjatë një ceremonie ku morën pjesë kryeministri bullgar Kiril Petkov dhe zyrtarë të lartë qeveritarë nga Sofja. Emri i Vanço Mihajlovit, një personalitet i Luftës së Dytë Botërore, që maqedonasit e konsiderojnë si fashist dhe për të cilin thonë se kishte urdhëruar krime ndaj popullatës maqedonase, nxiti pakënaqësi të shumta në qarqe jo vetëm politike maqedonase, pasi u përurua në Manastir.

Presidenti maqedonas Stevo Pendarovski, duke e dënuar djegien e objektit, thekson se “aktet e tilla paraqesin provokim dhe nuk shkojnë në favor të përmirësimit të marrëdhënieve me Bullgarinë”.

Më parë, edhe Ministria e jashtme e Maqedonisë së Veriut e ka dënuar ashpër aktin e vënies së zjarrit, ndërsa kërkon që të zhvillohen hetime të shpejta dhe keqbërësit të nxirren para drejtësisë. Ministri Bujar Osmani shprehet se “akti i këtillë vandal është edhe një dëshmi se ka shumë aktorë të cilët janë kundër arritjes së përparimit në marrëdhëniet me Bullgarinë dhe të ardhmes sonë të përbashkët evropiane”. Ai e quan këtë “një akt penal që është kryer jorastësisht sot, kur të dy shtetet do të zhvillojnë dialogun në funksion të kapërcimit të çështjeve të hapura në rrugën e integrimeve evropiane të Maqedonisë së Veriut”.

Ndërkohë, sot në Shkup mbërriti Ministrja e Punëve të Jashtme e Bullgarisë, Teodora Gençovska në një vizitë të planifikuar që më parë. Ajo do ta vizitojë edhe qendrën kulturore bullgare në Manastir./ VOA