web counter
LEXO PA REKLAMA!

SHKARKO APP

App Store
Google Play

Qindra alarme të rreme për bomba në Bosnje-Hercegovinë

2 Qershor 2022, 21:19, Kosova & Bota CNA
Qindra alarme të rreme për bomba në Bosnje-Hercegovinë
Spitali i përgjithshëm "Dr. Abdulah Nakaš ” në Sarajevë, Bosnje e Hercegovinë.

Gjykatat në Sarajevë dhe një spital publik boshnjak u evakuuan të enjten për shkak të alarmeve të rreme për bomba, të fundit nga më shumë se 500 alarme të tillë që vunë në shënjestër gjithashtu qindra shkolla, duke i detyruar ato të mbyllen përkohësisht.

Qindra pacientë dhe anëtarë të stafit mjekësor u evakuuan pasi spitali universitar në qytetin verior të Banja Lukës mori një e-mail që paralajmëronte se ishte vendosur një bombë, tha drejtori i spitalit Vlado Djajic. Mesazhi kërcënonte se do të "hidhte në erë jobesimtarët" dhe në të shkruhej "Allahu është i madh".

Pas kontrollit të ambienteve, policia konfirmoi se ishte një alarm i rremë.

Midis institucioneve publike të shënjestruara të enjten ishin edhe Komisioni Kombëtar Zgjedhor dhe disa gjykata në Sarajevë.

Autoritetet thanë se nuk dihen as motivi dhe as autorët e kërcënimeve. Gjykatat në Sarajevë i përshkruan ato si "terrorizëm".

E-mailet e dërguara në Republika Srpska erdhën nga një adresë e organizuar nga gjiganti i teknologjisë ruse “Yandex”, i njohur ndryshe si "google"-i rus, sipas gazetës së përditshme boshnjake "Oslobodjenje".

Gjatë bisedimeve të fundit me liderët e Bosnjës, Sekretari i Përgjithshëm i NATO-s, Jens Stoltenberg, theksoi nevojën për të rritur bashkëpunimin e sigurisë kibernetike me kombin ballkanas.

Edhe Serbia ka marrë gjithashtu një valë alarmesh të rreme për bomba gjatë javëve të fundit, të cilat kanë ndërprerë funksionimin e shkollave./ VOA





Lajmet e fundit nga