Zgjedhjet në Kosovë/ Kurti flet për formimin dhe përbërjen e qeverisë

4 Janar 2026, 17:52, Kosova & Bota CNA

Zgjedhjet në Kosovë/ Kurti flet për formimin dhe

Kryeministri i Kosovës, Albin Kurti ka deklaruar se sapo të certifikohen rezultatet e zgjedhjeve nga KQZ, synimi është që sa më shpejt të konstituohet Kuvendi dhe të formohet qeveria e Republikës. Në një intervistë për media, Kurti tha se vendimi më i rëndësishëm në mbledhjen e qeverisë do të jetë miratimi i buxhetit për vitin 2026.

“Sapo të certifikohen rezultatet nga Komisioni Qendror Zgjedhor, ne jemi të interesuar që sa më shpejt të konstituohet Kuvendi i legjislaturës së dhjetë, me kryesinë e kuvendit, dhe të formohet qeveria e Republikës, ku vendimi më i rëndësishëm qysh në fillim është buxheti për vitin 2026. Janë edhe disa vendime të tjera për mbledhjen e parë, por natyrisht më i rëndësishëm është buxheti”, u shpreh ai.

Ai foli edhe për përbërjen e kabinetit qeveritar, ku tha se nuk priten ndryshime të mëdha. Por shtoi se do të ketë konsultime të reja brenda Lëvizjes Vetëvendosje dhe me partnerët e koalicionit.

“Unë nuk mund të them që do të ketë ndryshime të mëdha, nuk do të ketë ndryshime të mëdha, por nuk mund të them as që do të jetë identike. E para, duhet ta presim rezultatin e zgjedhjeve dhe tash ju e keni parasysh që qytetarët bëjnë dy lloj zgjedhjesh: së pari zgjedhin subjektin politik, më pastaj zgjedhin kandidatët përbrenda subjektit politik, dhe aty ka ndryshime. Kemi deputetë që janë zgjedhur për herë të parë, kemi deputetë që janë konfirmuar edhe më fuqishëm, kemi të tillë që kanë ngecur ca. Duhet t'i kemi të gjitha në konsideratë para se ta marrim vendimin përfundimtar dhe ne jemi ekip i gjerë. Pra nuk është çështja vetëm renditja në hierarki, qoftë ajo brenda Lëvizjes Vetëvendosje apo jashtë saj në popull sa vota ka marrë kush, por kush, ku, për çka, kur, janë po ashtu shumë të rëndësishme. Domethënë, ne duhet ta shohim veten tonë individualisht në funksion të ekipit që e ndërtojmë, e që është bashkëdyzim i mazhorancës në Kuvend me kabinetin qeveritar” tha Kurti. /CNA