Trump: Xi miratoi marrëveshjen që "TikTok"-u të vazhdojë në SHBA

20 Shtator 2025, 11:22, Kosova & Bota CNA

Trump: Xi miratoi marrëveshjen që "TikTok"-u të

Presidenti i SHBA-së, Donald Trump, tha se Presidenti Kinez Xi Jinping kishte miratuar një marrëveshje për të mbajtur "TikTok"-un aktiv në SHBA, pas një telefonate midis dy presidentëve. Por detajet specifike janë ende të paqarta.

Uashingtoni ka bërë presion për të marrë kontrollin e "TikTok"-ut nga pronësia kineze, me Trump, i cili dikur bëri thirrje që platforma të ndalohej, por që e ka përdorur atë për të mbledhur mbështetës të rinj.

Çfarë tha Trump për "TikTok"-un?

Trump u tha gazetarëve në Zyrën Ovale se Xi "miratoi marrëveshjen e TikTok", duke shtuar se "mund të jetë një formalitet" për të arritur nënshkrimin e një marrëveshjeje më vonë.

Ai tha kështu pasi kishte zhvilluar një telefonatë me presidentin kinez më herët gjatë ditës.

"Do të kemi një kontroll shumë, shumë të rreptë", tha Trump. "'TikTok' ka një vlerë të jashtëzakonshme dhe unë jam pak i paragjykuar sepse sinqerisht ia dola shumë mirë me ndhihmën e saj."

Presidenti amerikan kishte thënë në një postim në rrjetet sociale pas telefonatës me Xi, se të dy zhvilluan një "bisedë produktive" që përfshinte disa tema.

Çfarë dimë deri më tani për marrëveshjen e "TikTok"-ut?

Qeveria amerikane pritet të marrë një pagesë prej disa miliarda dollarësh si pjesë e marrëveshjes, raportoi "Wall Street Journal".

Investitorët e përfshirë do t'i paguanin tarifën Uashingtonit në këmbim të ndihmës në negociatat me Kinën, sipas njerëzve që janë në brendësi të bisedimeve.

Raportohet se investitorët amerikanë do të fitonin kontrollin e aplikacionit të ndarjes së videove përmes një entiteti të ri që do të licenconte algoritmet e "TikTok"-ut nga kompania mëmë ByteDance.

Struktura synon të lehtësojë shqetësimet e sigurisë kombëtare mbi të dhënat e përdoruesve amerikanë, sipas raportit të gazetës.

Zyrtarët amerikanë kanë paralajmëruar prej kohësh se Kina mund të përdorë "TikTok"-un për të mbledhur të dhëna ose për të ndikuar në atë që përdoruesit shohin në internet, përfshirë edhe vitet e mandatit të parë të Donald Trump.

Të martën, Trump shtyu përsëri një ndalim të aplikacionit të njohur të videove, pavarësisht këtyre shqetësimeve për sigurinë kombëtare.

Cili është qëndrimi i Kinës për këtë marrëveshje?

Kina nuk ka konfirmuar asnjë marrëveshje për "TikTok"-un dhe i përshkroi diskutimet si "të sinqerta dhe të thella".

"Lidhur me çështjen e 'TikTok'-ut, Xi vuri në dukje se qëndrimi i Kinës është i qartë: qeveria kineze respekton vullnetin e ndërmarrjeve dhe i mirëpret ato për të zhvilluar negociata biznesi bazuar në rregullat e tregut, për të arritur zgjidhje që balancojnë interesat dhe përputhen me ligjet dhe rregulloret kineze", thuhet në një deklaratë.

"Kina shpreson që pala amerikane do të ofrojë një mjedis biznesi të hapur, të drejtë dhe jodiskriminues për kompanitë kineze që investojnë në Shtetet e Bashkuara."

Është hera e dytë që udhëheqësit e dy ekonomive më të mëdha në botë kanë folur që nga kthimi i Trump në Shtëpinë e Bardhë.

Trump tha gjithashtu se do të takohej me Xi gjatë zhvillimit të një samiti të forumit të Bashkëpunimit Ekonomik Azi-Paqësor në Korenë e Jugut që fillon në fund të muajit të ardhshëm dhe se ai planifikon të udhëtojë në Kinë vitin e ardhshëm./ CNA