web counter
LEXO PA REKLAMA!

SHKARKO APP

App Store
Google Play

Tragjedia e Koçanit/ 101 të lënduar dërgohen jashtë për mjekim

19 Mars 2025, 17:18, Kosova & Bota CNA

Tragjedia e Koçanit/ 101 të lënduar dërgohen jashtë

Personat e lënduar në tragjedinë e Koçanit në Maqedoninë e Veriut po dërgohen jashtë vendit, ndërsa numri i përgjithshëm i pacientëve që po mjekohen aktualisht jashtë vendit ka shkuar në 101 persona.

Ministri i Shëndetësisë në RMV, Arben Taravari ka zbuluar detaje për gjendjen shëndetësore të pacientëve brenda dhe jashtë vendit. Ai theksoi se të lënduarit janë në gjendje të qendrueshme.

“101 pacientë janë jashtë vendit, pas mbledhjes së shtabit të krizës sot në mëngjes kemi konstatuar se të gjithë pacientët fatmirësisht janë në gjendje relativisht stabile. Uroj dhe shpresoj që dalëngadalë të fillojmë të dërgojmë disa pacientë në shtëpi. Sot, tre apo katër pacientë do të kthehen në shtëpi. Transferimi i fundit do të bëhet sot, vetëm 5 pacientë në Suedi dhe pas kësaj nuk kemi më transferime”,- tha Taravari.

Të paktën 59 persona humbën jetën në orët e para të mëngjesit të së dielës në Koçan, si pasojë e zjarrit gjatë një koncerti me mbi 500 pjesëmarrës në një klub nate.

Qeveria e Maqedonisë së Veriut ka shpallur shtatë ditë zie.

Kryeministri maqedonas ka paralajmëruar përgjegjësi penale për të gjithë personat e përfshirë.

Ministri i Brendshëm i Maqedonisë, Pançe Toshkovski tha se sipas informacioneve të marra, zjarri ka shpërthyer si pasojë e mjeteve piroteknike të përdorura për efektet e ndriçimit në koncertin e grupit ADN, sipas Agjencisë Maqedonase të Lajmeve./CNA





Lajmet e fundit nga