LEXO PA REKLAMA!

SHKARKO APP

Sot dhe nesër anulohen 700 fluturime për në Gjermani, shkak grevat

20 Prill 2023, 08:50, Kosova & Bota CNA
Sot dhe nesër anulohen 700 fluturime për në Gjermani, shkak
Foto ilustruese

Të gjitha nisjet nga katër aeroportet në Gjermani do të anulohen sot dhe nesër, për shkak të grevës së punonjësve të kontrollit të sigurisë, e thirrur nga sindikata Verdi dhe të paktën 100 mijë persona do të përballen me pasojat e ndërprerjes.

Sipas shoqatës gjermane të aeroporteve, ADV, për shkak të grevave në aeroportet në Dusseldorf, Hamburg dhe Këln/Bon, rreth 700 fluturime dalëse do të anulohen, raporton "Reuters".

Sindikata Verdi i ka bërë thirrje gjithashtu stafit të sigurisë që të ndalojë punën në aeroportin e Shtutgartit të premten dhe nuk dihet se sa anulime do të shkaktojë kjo.

Arsyeja e grevës janë negociatat mes sindikatës dhe Shoqatës Federale të Kompanive të Sigurisë së Aviacionit (BDLS) për shpërblimet për ndërrimin e natës, punën të shtunave, të dielave dhe festave publike, të cilat nuk kanë shënuar progres.

Inflacioni i lartë në ekonominë më të madhe të Evropës ka shkaktuar një valë grevash në muajt e fundit pasi punëtorët kërkojnë paga më të larta për të kompensuar rritjen e kostove të jetesës.

Sindikata e hekurudhave dhe transportit EVG ka paralajmëruar një grevë njëditore për të premten. EVG po kërkon një rritje të pagave prej 12 për qind për 230,000 anëtarët e saj për shkak të rritjes së inflacionit dhe kostos së jetesës.

Greva, e cila do të fillojë në tre të mëngjesit dhe do të zgjasë deri në orën 11:00, do të ndikojë në punën e rreth pesëdhjetë kompanive hekurudhore, duke përfshirë edhe kompaninë shtetërore Deutsche Bahn, e cila është kompania më e madhe hekurudhore në Evropë.

 

 

Lajmet e fundit nga