web counter
LEXO PA REKLAMA!

SHKARKO APP

App Store
Google Play

Vritet një nga sulmuesit në veri/ Policia e Kosovës: Po u kundërpërgjigjemi sulmeve të tyre

24 Shtator 2023, 14:37, Kosova & Bota CNA

Vritet një nga sulmuesit në veri/ Policia e Kosovës: Po u

Policia e Kosovës ka dhënë një njoftim të fundit lidhur me situatën në Leposaviq, ku ka theksuar se është vrarë një nga agresorët. 

Në njoftim theksohet se efektivët e Kosovës po u përgjigjen sulmeve me armë të grupit të armatosur. 

"Njësitet policore konform situatës dhe rrezikut të shfaqur nga sulmet sporadike të grupeve kriminale, në vetëmbrojtje të tyre dhe të qytetarëve të asaj zone, janë detyruar t’u kundërpërgjigjen grupeve kriminale, ku referuar informacioneve të deritanishme, një nga sulmuesit është vrarë", njofton policia.

Situata në zonën e fshatit Banjska vazhdon të jetë e tensionuar, grupet kriminale kohë pas kohe po sulmojnë me armë zjarri njësitë policore në terren. Kjo e fundit po vetëmbrohet. 

"Situata në Veri të vendit, konkretisht në zonën e fshatit Banjska vazhdon të jetë e tensionuar, grupet kriminale kohë pas kohe po sulmojnë me armë zjarri njësitet policore në terren, të cilat edhe përkundër sulmeve ndaj tyre po vazhdojnë angazhimin duke krijuar perimetër të sigurisë, në interes të qetësimit të situatës, ofrimit të sigurisë dhe sundimit të rendit dhe ligjit në Kosovë. Sulmuesit profesional në numër të konsiderueshëm, të maskuar e të uniformuar me uniforma të ndryshme, të armatosur me armë të rënda, granata, mjete ushtarake (zolla), disa mjete të blinduara, po shfrytëzojnë hapësira dhe objekte të ndryshme, private, përfshirë në dhe përreth manastirit në Banjska, për të kryer lëvizje, strehim dhe pozicionim për gjuajtje me armë zjarri ndaj njësiteve policore të PK-së", njofton policia e Kosovës. 

Policia e Kosovës njofton se më tej se për shkak të situatës së krijuar gjatë orëve të fundit, janë mbyllur pikat kufitare në Jarinjë dhe Bërnjak. 

"Referuar situatës dhe rrethanave të krijuara, Policia e Kosovës për shkaqe sigurie ka mbyllur për qarkullim kufitar dy vendkalimet kufitare në veri (Jarinje dhe Bërnjak), andaj fton të gjithë qytetarët që të shfrytëzojnë pikat tjera kufitare për qarkullim si dhe të shmangun daljet dhe lëvizjet e tyre në atë rajon/zonë. Bashkëpunimi dhe koordinimi i Policisë së Kosovës me institucionet kompetente vendore dhe ndërkombëtare po vazhdon, me qëllim të ruajtjes së rendit dhe sigurisë publike si dhe sjelljes para organeve të drejtësisë së kryerësve të sulmeve të vazhdueshme ndaj zyrtarëve policorë dhe njëherit fton ata që të dorëzohen para organeve të rendit, thuhet në njoftim. 

 





Lajmet e fundit nga