Përkeqësohen kushtet në Gaza/ Izraeli ndërpret edhe energjinë elektrike

9 Mars 2025, 22:22, Kosova & Bota CNA

Përkeqësohen kushtet në Gaza/ Izraeli ndërpret edhe

Izraeli ka njoftuar këtë të diel ndërprerjen e furnizimit me energji elektrike në territorin palestinez.

Kjo lëvizje e paralajmëruar nga ana e Izraelit ka si qëllim të ushtrojë presion ndaj Hamasit, për të zgjatur armëpushimin dhe për të çliruar pengjet.

Pasojat nuk janë menjëherë të dukshme, por impiantet në këtë territor të thatë marrin pikërisht energjinë elektrike për prodhimin e ujit të pijshëm. Izraeli javën e kaluar ndërpreu të gjitha furnizimet me mallra në Gaza, territor ku jetojnë mbi dy milionë njerëz. Qëllimi i tij është të bëjë që grupi militant Hamas të pranojë një zgjatje të fazës së parë të armëpushimit. Kjo fazë përfundoi fundjavën e kaluar, por Izraeli dëshiron që Hamas të çlirojë gjysmën e pengjeve të mbetur në këmbim të një premtimi për të negociuar një armëpushim të qëndrueshëm.

Hamas, nga ana tjetër, dëshiron të nisë negociatat për fazën e dytë më të vështirë të armëpushimit, që do të përfshinte çlirimin e pengjeve të mbetur nga Gaza, tërheqjen e forcave izraelite dhe një paqe të qëndrueshme. Hamas mendohet të ketë 24 pengje të gjallë dhe trupat e 35 të tjerëve.

Grupi militant, i cili ka paralajmëruar se ndërprerja e furnizimeve për Gazën do të ndikonte edhe tek pengjet, tha të dielën se ka përfunduar raundin e fundit të bisedimeve për armëpushimin me ndërmjetësuesit egjiptianë pa ndryshuar qëndrimin e tij, duke kërkuar një fillim të menjëhershëm të fazës së dytë të armëpushimit.

Izraeli kishte paralajmëruar kur ndërpreu të gjitha furnizimet, se mund të ishte radha e ujit dhe energjisë elektrike. Letra nga ministri i energjisë i Izraelit për Korporatën Elektrike të Izraelit, i thotë asaj të ndalojë shitjen e energjisë për Gazën.

Territori bregdetar dhe infrastruktura e tij janë shkatërruar nga lufta, për furnizimin me energji përdoren gjeneratorë dhe panele diellore. Ndërprerja e energjisë elektrike mund të ndikojë gjithashtu edhe te pastrimi i ujërave të ndotur. Qindra kamionë me ndihma futeshin çdo ditë në territorin palestinez, derisa Izraeli i ndërpreu ato.

Izraeli ka marrë kritika të ashpra për ndërprerjen e furnizimeve për Gazën. "Çdo mohim i hyrjes së nevojave jetësore për civilët mund të përbëjë ndëshkim kolektiv", tha zyra e Kombeve të Bashkuara për të drejtat e njeriut disa ditë më parë.

Armëpushimi ka pezulluar luftimet më shkatërruese dhe më të rënda midis Izraelit dhe Hamasit, të ndezura nga sulmi i udhëhequr nga grupi militant në jug të Izraelit më 7 tetor 2023. Faza e parë lejoi kthimin e 25 pengjeve të gjallë dhe trupat e tetë të tjerëve, në këmbim të çlirimit të gati 2 mijë të burgosurve palestinezë.

Forcat izraelite janë tërhequr nga disa zona brenda Gazës, ndërsa qindra e mijëra palestinezë të emigruar janë kthyer në veri të vendit të tyre, për herë të parë që nga fillimi i luftës./CNA