web counter
LEXO PA REKLAMA!

SHKARKO APP

App Store
Google Play

Pavarësia e Kosovës/ Donald Trump letër urimi Vjosa Osmanit

16 Shkurt 2025, 17:58, Kosova & Bota CNA

Pavarësia e Kosovës/ Donald Trump letër urimi Vjosa Osmanit

Presidenti i Shteteve të Bashkuara, Donald Trump me anë të një letre ka uruar presidenten e Kosovës, Vjosa Osmani për 17-vjetorin e Pavarësisë.

Në letrën dërguar Osmanit, Trump shprehet se SHBA do të vazhdojë të punojnë me Kosovën për forcimin e institucioneve demokratike. Ai thotë gjithashtu se pret një marrëdhënie më produktive mes SHBA dhe Kosovës.

 

Letra e plotë e Presidentit Trump:

E nderuara Zonja Presidente,

Në emër të popullit të Shteteve të Bashkuara, ju lutem pranoni urimet e mia më të përzemërta për Ju dhe popullin e Kosovës me rastin e Ditës së Pavarësisë. Rrugëtimi i Kosovës si një komb sovran është shënuar nga qëndrueshmëria dhe vendosmëria.

Shtetet e Bashkuara mbështesin plotësisht Kosovën dhe angazhimin e saj për ta ndërtuar një shoqëri demokratike, ku të gjithë qytetarët e saj mund të jetojnë dhe të lulëzojnë së bashku. Lidhjet mes popujve tanë janë të forta dhe presim me kënaqësi t’i zgjerojmë ato, veçanërisht përmes rritjes së mundësive për investime, me qëllim që të sjellim më shumë prosperitet për të dyja vendet tona. Shtetet e Bashkuara do të vazhdojnë të punojnë me Kosovën në forcimin e institucioneve demokratike dhe promovimin e rritjes ekonomike përmes një mjedisi të qëndrueshëm dhe të drejtë biznesi.

Shtetet e Bashkuara presin ta ndërtojnë një marrëdhënie më produktive me qeverinë e Kosovës në vitin në vazhdim. Ndërsa punojmë me Kosovën dhe fqinjtë e saj për ta ndërtuar një rajon më të begatë dhe më të sigurt, është e rëndësishme që Kosova të integrohet më tej me komunitetin euroatlantik. Mbështetja e palëkundur e Kosovës për Ukrainën përballë agresionit rus vlerësohet shumë.

Përvjetori i pavarësisë së Kosovës është një moment për të nderuar arritjet e së kaluarës si dhe për të parë drejt një të ardhmeje më të ndritur dhe marrëdhënieve më të thella mes kombeve tona. Ju dërgoj urimet e mia më të mira popullit të Kosovës në këtë ditë feste./ CNA





Lajmet e fundit nga