web counter
LEXO PA REKLAMA!

SHKARKO APP

App Store
Google Play

E fundit!

x

Arrestohet në RMV një shtetas nga Kosova/ BDI: Ministria e Brendshme nuk ka kryer verifikime

15 Shkurt 2025, 21:41, Kosova & Bota CNA

Arrestohet në RMV një shtetas nga Kosova/ BDI: Ministria e Brendshme

Policia e Maqedonisë së Veriut ka arrestuar një person, i cili raportohet se është ish-ushtar i UÇK-së. Bëhet fjalë për 55-vjeçarin B.E. i arrestuar në Pikën Kufitare të Bllacës, që lidh Kosovën me Maqedoninë e Veriut. Shkak për vënien në pranga të tij ka qenë një urdhërarrest ndërkombëtar i lëshuar nga Serbia përmes Interpol-it. I arrestuari ndodhet në komisariat dhe pritet vendimi nëse do të lirohet apo do të kryhet ekstradimi i tij.

Për arrestimin e B.E. një reagim ka ardhur nga partia Bashkimi Demokratik për Integrim. Në deklaratën e saj, BDI dënon ashpër arrestimin e 55-vjeçarit si dhe akuzon Ministrinë e Brendshme të Maqedonisë së Veriut se vepron pa kryer asnjë verifikim, duke cenuar lirinë e qytetarëve. Gjithashtu BDI thotë se arrestimi i B. E. është mbajtur i fshehtë për më shumë se 10 orë.

Reagimi i plotë

Bashkimi Demokratik për Integrim shpreh shqetësimin e thellë dhe dënon ashpër arrestimin e qytetarit të Republikës së Kosovës, z. Bajrami, më 14 shkurt 2025, në pikën kufitare Bllacë – Hani i Elezit, bazuar në një urdhër-arrest të lëshuar nga Serbia përmes Interpolit.

Ky është një tjetër rast i papranueshëm i zbatimit të fletarresteve të fabrikuara nga Serbia nga ana e Ministrisë së Punëve të Brendshme të Maqedonisë së Veriut, e cila vazhdon të veprojë pa asnjë filtër verifikimi, duke rrezikuar të drejtat dhe liritë e qytetarëve të Kosovës. Edhe më shqetësuese është fshehja për më shumë se 10 orë e këtij ndalimi nga opinioni publik, një veprim që vetëm sa shton dyshimet për qëllimet e vërteta të këtyre masave.

Arrestime të tilla, të përsëritura dhe të padrejta, po ndodhin pikërisht në një periudhë kur Maqedonia e Veriut qeveriset nga një ekzekutiv i pafuqishëm dhe pa legjitimitet etnik. Përfaqësuesit shqiptarë në këtë qeveri kanë dëshmuar jo vetëm mungesë ndikimi, por edhe paaftësi për të mbrojtur interesat e qytetarëve shqiptarë brenda dhe jashtë vendit. Kjo situatë e rrezikshme nuk prek vetëm shqiptarët e Maqedonisë së Veriut, por edhe qytetarët e Kosovës, të cilët përballen me pasiguri dhe padrejtësi sa herë që udhëtojnë në vendin tonë.

BDI ka qenë dhe mbetet e palëkundur në qëndrimin e saj se fletarrestet e lëshuara nga Serbia përmes Interpolit nuk duhet të zbatohen verbërisht nga institucionet e Maqedonisë së Veriut. Gjatë qeverisjes me përfaqësim legjitim shqiptar, ne kemi parandaluar raste të tilla dhe kemi garantuar mbrojtjen e të drejtave të qytetarëve të Kosovës.

Kërkojmë lirimin e menjëhershëm dhe të pakushtëzuar të z. Bajrami dhe i bëjmë thirrje Qeverisë së Maqedonisë së Veriut të rishikojë urgjentisht praktikën e ekzekutimit të fletarresteve të Serbisë. Nuk mund të lejojmë që shteti ynë të bëhet mjet i politikave të Beogradit, në dëm të qytetarëve shqiptarë./ CNA





Lajmet e fundit nga